VOV4.Bahnar - Đơ̆ng rŏng 2 ‘măng hop akŏm pơma dơnŭh, Dơnŏ anĭh Mặt trận Tổ quốc Việt Nam dêh char Dak Lăk pơm pơkeh chĭh hla bơar chĭh hơnăn bơngai ăn pôk rơ̆ih pơm kơdră tang măt Kuô̆k hô̆i păng Jơnŭm vei lăng kon pơlei. Rim tơring lơ̆m dêh char hlôi jang keh đang bơ̆ jang iŏk nơ̆r tơgop đơ̆ng bơngai tăh hla tơ̆ tơring oei, yak trŭh ‘măng hop akŏm, rơ̆ih iŏk ‘măng mă 3, hơmet ăn ‘lơ̆ng liĕm ăn pôk rơ̆ih.

Kiơ̆ đơ̆ng Dơnŏ anĭh Mặt trận Tổ Quốc dêh char hơlen, rim ‘măng iŏk nơ̆r tơgop đơ̆ng bơngai tăh hla đei pơgơ̆r ‘lơ̆ng, tơpăt, ƀlep trong pơkăp, ƀlep tơchơ̆t. Trŭh năr 12/4, đĭ đăng bơngai chĭh hơnăn ăn pôk tơmơ̆t jang Kơdră tang măt Kuô̆k hô̆i păng Jơnŭm vei lăng kon pơlei tơ̆ Dak Lăk oei sơđơ̆ng drơ̆ng kiơ̆, sơđơ̆ng ăn hop akŏm ‘măng mă 3 đei pơgơ̆r ƀlep lơ̆m jơ ‘năr pơkă. Tơ̆ hop akŏm ‘măng mă 2, Dơnŏ anĭh Mặt trận Tổ quốc Việt Nam dêh char Dak Lăk hlôi drơ̆ng mĭnh nơ̆r pơm hla bơar chĭh hơnăn 12 ‘nu kơ tơring ăn pôk tơmơ̆t pơm Kơdră tang măt Kuô̆k hô̆i jăl XV păng 138 ‘nu bơngai pơm Kơdră tang măt Jơnŭm vei lăng kon pơlei dêh char. Tơchĕng hơdrol, Dak Lăk gô pơgơ̆r hop akŏm pơma dơnŭh ‘măng mă 3 lơ̆m năr 16/4.

Tơblơ̆ nơ̆r: Amazưt