VOV4.Bahnar - Dơnŏ anĭh vei lăng kon pơlei apŭng Ea Hleo, dêh char Dak Lăk tơbăt, Tơdrong vă jang Hnam kmăi ŭnh hơyŭh đơ̆ng kial Ea Nam lơ̆m au hlôi tơ iung pơjing keh đang, lăp pă pơm pơkeh hơmet pơ ‘lơ̆ng kih thuơ̆t ‘nŏh gô vă vang tơmơ̆t ŭnh hơyŭh lơ̆m tĕh đak hloi. ‘Nau ư̆h khan lăp tơdrong vă jang ŭnh hơyŭh đơ̆ng kial tơ̆ kông tĭh hlŏh lơ̆m tĕh đak, đei ming man keh đang tĕnh koăng, mă lei oei pơjing đei tơdrong iŏk đei mŭk drăm păng tơpôl dơ̆ng.

Mĭnh hơnĭh hnam kmăi ŭnh hơyŭh kial Ea Nam

Tơdrong vă jang Hnam kmăi ŭnh hơyŭh đơ̆ng kial Ea Nam kơ yuơ Grŭp jang Trung Nam pơm tơngla tơmơ̆t jên jang, đei 84 Hơdrơ̆ng vơvĕr, 1,2km tơlei ŭnh hơyŭh 500kv, akop kon jên tơmơ̆t jang 16.500 ti hlak jên, đei tơlĕch jang lơ̆m 3 tơring Ea Nam, Ea Khal hăm Dliê Yang, apŭng Ea H’Leo. Tơdrong vă jang đei tơchơ̆t ăn tơmơ̆t jang lơ̆m năr 31/12/2020 păng khei ‘năr ming man đei jang lơ̆m khei ‘năr jĭ hơbŭh Covid-19 pơrăm. Mă lei, hăm tơdrong hơdrin kơtang đơ̆ng pơđĭ tơngla tơmơ̆t jên jang, rim hơnĭh jangpăng kơdră chĕp pơgơ̆r apŭng Ea Hleo păng dêh char Dak Lăk, tơdrong jang đei ming man keh đang mă lei hoei đei tơdrong sar bar ư̆h kơ ‘lơ̆ng hơ iă au to păng tơgar dĭh băl au to ră. Kiơ̆ đơ̆ng tơngla tơmơ̆t jên jang hơlen, mư̆h tơmơ̆t jang, Tơdrong vă jang hnam kmăi ŭnh hơyŭh đơ̆ng kial Ea Nam gô pơjing đei hlŏh 1 ti 100 trĭu kWh lơ̆m sơnăm. Tơdăh hơnĭh jang ŭnh hơyŭh răt pơđĭ ŭnh hơyŭh au, tơdrong đei iŏk yua đơ̆ng tơdrong jang au dang 94 trĭu dolar, tơgop ăn kon jên bơ̆ jang tơring dang 250 ti hlak jên lơ̆m 1 sơnăm.

Tơblơ̆ nơ̆r: Amazưt