VOV4.Bahnar  – Năr 16/6, anih jang y tê̆ dêh char Đăk Lăk pơtơm tơlĕch ƀet pơgang vaccine bơ̆ng jĭ Covid-19 'măng mă 2 ăn jê̆ 30.000 'nu bơngai hơlen lăng lơ̆m dêh char. 'Măng mă âu, Đăk Lăk iŏk đei 27.210 kơliu vaccine AstraZeneca. Hơkŏp kơsô̆ kơsô̆ bơngai đei ƀet 'măng mă 2 noh 29.900 'nu.

Lơ̆m noh, bơngai đei ƀet 'măng mă 1 noh 21.787 'nu, đei khul jang tang găn păng tơjră pơrang jĭ tam mă đei ƀet 'măng mă 1 nhen bơngai jang y tê̆, bơngai vang jang tơjră pơrang jĭ, khul linh, khul kŏng ang vang jang tang găn păng tơjră pơrang jĭ, bơngai chă pơdŭ tơmam drăm kăl lơ̆m grê păr, chơ pơdŭ tơmam drăm, jang tơmang pơhiơ̆; bơngai jang găh unh hơyuh, găh đak xŏ nhă, bơngai pơtho (mẫu yăo, mầm non, jăl kơđeh); bơngai bơ̆ jang tơ̆ dôm anih pơtho pơhrăm, bơngai jang tơ̆ dôm anih jang hơnơ̆ng tơjrâ̆m lơ bơngai (dôm Anih jang lơ̆m plei tơm Buôn Ma Thuột). Dôm bơngai ƀet 'măng mă 2 đei 8.113 bơngai jang y tê̆ hlôi ƀet 'măng mă 1. Lơ̆m 'măng mă 2 tơlĕch ƀet vaccine bơ̆ng jĭ Covid-19, ưh đei ƀet pơgang ăn dôm bơngai đei tơdrong jĭ đunh năr păng bơngai kơpal kơ 65 xơnăm.  

Lan chih păng pơre nơ̆r