VOV4.Bahnar - Dak Lak kăl hơ tŏk loi dơ̆ng lăm pơ long hơ met hiă lơ̆m ‘măng pơ long lĕch ‘măng khoă hŏk đĭ jăl 3 sơ năm 2021, ‘nâu jĭ athei đơ̆ng phŏ kơ dră Anih tơm vei lăng găh pơ tho pơ hrăm Nguyễn Văn Phúc tơ̆ jơ bơ̆ jang hăm Anih pơ gơ̆r ‘măng pơ long lĕch ‘măng khoă hŏk đĭ jăl 3 sơ năm 2021 dêh char Dak Lak găh tơ drong jang hơ met ăn ‘măng pơ long lĕch ‘măng khoă hŏk đĭ jăl 3 tơ̆ tơ ring kơ sơ̆ ‘năr 2-7. Khŭl hlôi hơ len lăng hơ nih in đê pơ long, hơ nih pơm kăt hơ năn, châm ƀai pơ long păng tơ mam drăm tơ̆ 1,2 hơ nih pơ long lơ̆m dêh char. Lơ̆m noh akŏm hơ len lăng tơ̆ dôm hơ nih đei lơ hŏk tro pơ long kơ dih. Tơ̆ hơ năp tơ drong Covid 19 tŏk bŏk đei ƀôh krê hư mơt, phŏ kơ dră Anih tơm vei lăng găh pơ tho pơ hrăm Nguyễn Văn Phúc tơ tă kŭm hăm vei sơ đơ̆ng ‘măng pơ long pơ gơ̆r tơ păt, ƀlep tơ drong hơ găt dêh char Dak Lak kŭm kăl kơ bơ ngơ̆t truh tơ drong vei sơ đơ̆ng lơ̆m tang găn jĭ ăn kang ƀô̆, thây kô pơ tho, bơ ngai jang pơ vih pơ văn ăn ‘măng pơ long păng hŏk tro vang năm pơ long. ‘Măng pơ long lĕch ‘măng khoă hŏk đĭ jăl 3 sơ năm ‘nâu, Dak Lak đei hloh 19.800 ‘nu hŏk tro chih măt vang pơ long. Dêh char hơ met ăn 32 hơ nih pơ long hăm hloh 840 hơ nih pơ long. Hloh 2.700 ‘nu kang ƀô̆, thây kô pơ tho, bơ ngai jang lơ̆m pơ tho pơ hrăm, kŏng an, jang pơ gang... đei hơ vơn vang jang rim tơ drong jang lăng pơ long, dăr hơ len, vei sơ đơ̆ng.

Thuem: Tơ blơ̆