VOV4.Bahnar - Năr 16/4, Dơnŏ anĭh Mặt trận Tổ quốc Việt Nam dêh char Dak Lăk pơgơ̆r Hop akŏm pơma dơnŭh ‘măng mă 3, tơroi tơbăt pơtôch bơ̆ jang iŏk nơ̆r hơlen păng drơ̆ng kiơ̆ đơ̆ng bơngai tăh hla mă rim kơdră tang măt oei, drơ̆ng mĭnh nơ̆r hơnăn dôm bơngai gơ̆h vă pôk tơmơ̆t pơm Kơdră tang măt Kuô̆k hô̆i jăl XV, păng kơdră tang măt Jơnŭm vei lăng kon pơlei dêh char, jăl jang 2021-2026.

‘Moi kiơ̆ rim hla bơar tơchơ̆t, hlŏh đơ̆ng pơma dơnŭh, tơ̆ hop akŏm pơma dơnŭh ‘măng mă 3, rim kơdră tang măt hlôi pơdrơ̆ng nơ̆r drơ̆ng kiơ̆ pơm hla bơar chĭh hơnăn 11 ‘nu bơngai ăn pôk tơmơ̆t pơm Kơdră tang măt Kuô̆k hô̆i jăl XV. Hop akŏm jei drơ̆ng mĭnh nơ̆r hơnăn hăm 125 ‘nu bơngai gơ̆h vă pôk tơmơ̆t pơm Kơdră tang măt jơnŭm vei lăng kon pơlei dêh char, jăl jang 2021-2026, klăh asong vĭh tơ̆ 20 hơnĭh pôk rơ̆ih vă pôk rơ̆ih iŏk đei 75 ‘nu kơdră. Lăp đơ̆ng rŏng hop akŏm pơma dơnŭh ‘măng mă 3, Dơnŏ anĭh vei lăng Pôk rơ̆ih dêh char Dak Lăk gô hơnơ̆ng pơgơ̆r ăn rim bơngai đei hơnăn vă pôk tơmơ̆t năm tơ ƀơ̆p tơroi tơbăt hăm bơngai tăh hla găh trong bơ̆ jang kơ dĭh.