VOV4.Bahnar - Kơ yuơ đei ƀơm đơ̆ng jĭ hơbŭh Covid-19, lơ khei au ki, rim hơnĭh jang gre chơ tơmoi tơmam drăm Dak Lăk jang sa ư̆h kơ iŏk đei đơ̆ng 70 – 80%, đei ‘măng  ư̆h kơ iŏk đei hloi mư̆h pơdơ̆h jang chơ đe. Tơ̆ hơnăp tơdrong mơmat tat kơ hơnĭh jang, Khŭl gre chơ tơmoi tơmam drăm Dak lăk apĭnh athei rim hơnĭh bơ̆ jang tơjur jên thuê̆, dăh mă pơđunh khei ‘năr kla hre, ba ăn ƀao hiêm ăn bơngai jang vă rim hơnĭh jang au yak hlŏh khei ‘năr mơnat tat hlŏh hrei ‘nau.

Kơ yuơ jĭ hơbŭh Covid-19 tơpŏh dơ̆ng, rim hơnĭh jang gre chơ tơmoi tơ̆ Dak Lăk jang tŏ sĕt, pơdơ̆h jang

Kŏng ty jang Mơdro sa păng Chơ tơmam drăm tơmoi Hải Cường (oei lơ̆m pơlei tơm Buôn Ma Thuột) đei 8 tong gre giơng tep, joăt kơdau chơ tơmoi Dak Lăk - Hà Nội, hăm hlŏh 30 ‘nu bơngai jang ‘nŏh bơngai vơ̆r gre, bơngai jang tơgŭm ăn vơ̆r gre, bơngai jang jên hu, bơngai jang tăh akŏm tơmam drăm. Ƀok Nguyễn Hải Cường - Kơdră chĕp pơgơ̆r Kŏng ty jang Mơdro sa păng Chơ tơmam drăm tơmoi Hải Cường tơbăt, kơ yuơ jĭ hơbŭh kơna lơ khei au ki tơmoi hao gre tơjur kơtang, rim gre ư̆h kơ đei kơdau chơ tơmoi đơ̆ng Dak Lăk năm tơ̆ Hà Nội păng hơdrơ̆k dơ̆ng pơm ăn tơdrong jang sa ư̆h kơ lĕch. Mă đơ̆ng jang sa hiong răm lơ mă lei kŏng ty oei hơnơ̆ng năm ba ăn kon jên thuê̆ dăh mă kla ăn kon jên răt Ƀao hiêm tơpôl ăn bơngai jang ‘moi kiơ̆ tơdrong tơchơ̆t. Tơdăh ư̆h kơ đei tơgŭm djru tơtom lei rŏ năng hơnĭh jang au ư̆h kơ jor gô sơlăh tơpă mơ̆n.“Lơ̆m khei ‘năr au, hơnĭh jang măh soch iŏk kon jên kơ dĭh tăh ăn tơdrong bơ̆ jang au dang 100 trĭu hlak jên. Kon jên au pơ đĭ jên khei ăn bơngai jang, jên thuê̆, cham gre dơ̆ng, jên thuê̆ trong nơnăm, kon jên chĕh kơ hơnĭh mong jên. Nhôn apĭnh rim hơnĭh bơ̆ jang kơpal nhen Dơnŏ anĭh vei lăng Trong gre nơnăm, Dơnŏ anĭh thuê̆ dêh char, rim hơnĭh mong jên tơ jur kon jên chĕh, kon jên thuê̆ VAT, kon jên thuê̆ trong nơnăm ... Ăp mă lơ lŏh nhôn mă kĕ dơ̆ng kơ jăp, trŭh dang yơ tang găn kĕ tơdrong jĭ ‘nŏh mă vĭh hơlơ̆k jang dơ̆ng”.

Tơdrong jang sa iŏk đei kơ rim hơnĭh jang Khŭl gre chơ tơmoi Dak Lăk tơjur 70 - 80%, đei ‘măng ư̆h kơ iŏk đei hloi

Khŭl gre chơ tơmoi dêh char Dak Lăk đei 40 hơnĭh jang hơdoi, hăm hlŏh 18.000 tong gre chơ tơmoi păng gre chơ tơmam drăm rim kơ loăi. Ƀok Phạm Văn Mạnh - Kơdră chĕp pơgơ̆r Khŭl gre chơ tơmoi tơmam drăm Dak Lăk tơbăt, kơ yuơ jĭ hơbŭh Covid-19 pơrăm hơlơ̆k dơ̆ng kơna pơm kơnê̆ kơtang trŭh tơdrong mơdro sa, chơ tơmoi tơmam drăm kơ rim hơnĭh mơdro sa.

Mă hơdăh, gre chơ tơmoi nhen gre chơ tơmoi, gre buyt, gre taxi măh kăt tơ jur tong gre chơ chơ tơmoi ... Tơdrong jang sa iŏk đei jô̆ hơtŏ tơ jur đơ̆ng 70-80%, lơ̆m mă đĭ đăng rim hơnĭh mơdro sa au jei tŏk iŏk kon jên đơ̆ng hơnĭh mong jên vă răt gre chơ tơmoi, tơmam drăm ngăl. ‘Ngoăih kơ ‘nŏh, rim hơnĭh mơdro sa au jei kăl kla ăn kon jên khei păng tơgŭm kon jên hiong tơdrong jang pơ gia ăn rim kang ƀô̆ păng bơngai jang; kla ăn kon jên răt ƀao hiêm tơpôl, ƀao hiêm hiong tơdrong jang; thuê̆ jên rok trong, kon jên hơmet ming trong; jên thuê̆ rim kơ loăi, kon jên chĕh kơ hơnĭh mong jên…

Ƀok Phạm Văn Mạnh tơbăt, tơ̆ hơnăp tơdrong tơnap tap au, Khŭl hlôi pơm hla bơar apĭnh rim hơnĭh bơ̆ jang vang chă tơgum djru rim hơnĭh mơdro sa au lơ̆m khei ‘năr jĭ hơbŭh Covid – 19 oei hơnơ̆ng pơrăm kơtang.“Nhôn hlôi pơm hla bơar pơtrŭh athei Dơnŏ anĭh tơm bơ̆ jang jên hu păng hơnĭh jang thuê̆ lăng hơlen tơlĕch trong pơkăp thuê̆ VAT hăm hơnĭh mơdro sa tơjur trŭh 1 – 2% pơtêng hăm 10% nhen tơdrong tơchơ̆t hơdrol au ki; găh hơnĭh mong jên nhôn jei hơpơi ‘mĕh vă đe sư pơm pơđunh khei ‘năr hre ư̆h kơ iŏk jên chĕh lơ̆m 12 khei kơ sơnăm 2021; găh kon jên răt ƀao hiêm tơpôl, nhôn jei apĭnh athei Dơnŏ anĭh tơm vei lăng Tơdrong jang, Bơngai rơka păng Tơpôl đei nơ̆r pơma athei Ƀao hiêm dêh char ư̆h kơ iŏk kon jên răt ƀao hiêm ăn bơngai jang lơ̆m 1 sơnăm, păng gô iŏk dơ̆ng kon jên răt ƀao hiêm au mư̆h hơnĭh mơdro sa đei iung jang dơ̆ng.”

Ƀok Lê Đình Minh - Kơ iĕng Kơdră chĕp pơgơ̆r Dơnŏ anĭh vei lăng Trong gre nơnăm Dak Lăk sơkơ̆t hơdăh, dang ei hơnĭh au hlôi sơng iŏk đei hla bơar krao hơvơn tơgŭm dŏng đơ̆ng Khŭl gre chơ tơmoi tơmam drăm Dak Lăk. Hơnih au hlôi hơlen hơdăh dôm tơdrong apĭng athei vă tơbăt ăn Dơnŏ anĭh vei lăng kon pơlei dêh char păng rim hơnĭh bơ̆ jang đei ƀơm trŭh jang kiơ̆ tơdrong ư̆h kơ iŏk, tơ jur kon jên kla ăn hloi đơ̆ng rim hơnĭh mơdro sa, hơp tak xah jang gre chơ tơmoi tơmam drăm lơ̆m dêh char.“Hrei au, kiơ̆ nơ̆r apĭnh athei đơ̆ng Khŭl jang gre chơ tơmoi tơmam drăm Dak Lăk, Dơnŏ anĭh vei lăng kon pơlei dêh char hlôi pơjao ăn Dơnŏ anĭh bơ̆ jang Jên hu dêh char, Dơnŏ anĭh vei lăng Tơdrong jang, Bơngai rơka păng Tơpôl, Dơnŏ anĭh vei lăng Trong gre nơnăm, Dơnŏ anĭh vei lăng jang pơgang, Dơnŏ anĭh Thuê̆ dêh char, Hơnĭh mong jên, Ƀao hiêm ... akŏm lăng hơlen nơ̆r pơtho tơbăt đơ̆ng Trung ương păng dôm tơdrong đei ƀô̆h yan au tơ̆ dêh char vă tơlĕch trong jang tơgum djru rim hơnĭh mơdro sa jang gre chơ tơmoi tơmam drăm lơ̆m khei ‘năr pơdơ̆h jang chơ tơmoi vă tang găn jĭ Covid-19, yak hlŏh khei ‘năr mơmat tat hrei au. Dang yơ drơ̆ng mĭnh nơ̆r đang trong bơ̆ jang ‘nŏh pơtrŭh ăn Dơnŏ anĭh vei lăng kon pơlei dêh char xek tơlang kiơ̆ ƀlep tơdrong tơchơ̆t kơ khôi luơ̆t”.

Bơngai chĭh: Tuấn Long

Tơblơ̆ nơ̆r: Amazưt