VOV4.Bahnar - Tơ̆ dêh char Dak Lăk hrei au đei vă jê̆ 4.000 bơngai drŏ kăn bơ̆ jang pơgang. Lơ̆m ‘măng iung tơ jră tang găn jĭ hơbŭh Covid -19, hlôi tơ jră mŭh măt hăm dôm tơdrong hli hlơt, đơ̆ng dôm bơngai bơ̆ jang khăm hơlen lơ̆m kon pơlei, dăh mă lơ̆m rim hơnĭh khăm hơlen pham, dăh mă vei lăng ming hơmet bơngai jĭ Covid-19…, đe hăp hơnơ̆ng plang ăn pơ đĭ jơhngơ̆m jăn, jơhngơ̆m đon, lê̆ tơ̆ rŏng dôm tơdrong kơ dĭh vă krơ̆ng jơhngơ̆m bơ̆ jang.

Ư̆h kơ hiơt ‘măng pơma dơnŭh păng điên thoăi “ƀrơ̆k jơhngơ̆m” hăm ŭnh hnam bơngai jĭ Covid -19

Brŏk vĭh tơ̆ hnam lăp đơ̆ng rŏng 1 khei vang năm bơ̆ jang tơ̆ pơlei tơm Hồ Chí Minh tang găn jĭ Covid-19, ƀak si Trần Thị Lệ, Khoa ung Bướu, Hnam pơgang tơm Tơring Tây Nguyên oei hơnơ̆ng hiơ̆r lơ̆m jơhngơ̆m. Hơnĭh mŏ bơ̆ jang ‘nŏh hơnĭh ming hơmet ăn bơngai jĭ Covid-19 tơ̆ Khoa nhiệt đới, Hnam pơgang Chợ Rẫy. Tơdrong mơdŭk mơdăk đe ƀok thây pơgang vă hơdrin dŏng erĭh ăn bơngai jĭ ăl, tơdrong dui jơhngơ̆m mơhêt mơhat kơ bơngai jĭ atŭm hăm re tit tit đơ̆ng rim kmăi Ecmo … nhen brŏ dăr re rơdơ̆ đơ̆ng mŏ chă tơroi:“Dôm tơdrong răm đei ƀô̆h rim năr, rim ‘măng bơngai jĭ lôch lơ̆m mă nhôn hơdrin đĭ ai chă ming hơmet ‘nŏh hlŏh đơ̆ng tơdrong lơ lŏh pơm ăn kơ bơ̆n sa roi sơ ‘nhôi sơ ‘ngon mă lei nhôn jei hơdrin, bơngai jĭ lơ lŏh mă lei jơhngơ̆m đon bơ̆n lê̆ jơhngơ̆m đon sơ ‘nhôi ‘nŏh tơdrong ming hơmet ư̆h hơ iă kơna nhôn hơdrin yak hlŏh ơ̆h sơ ‘ngon ‘nŏh vă chă ming hơmet ăn bơngai jĭ. ‘Ngoăih tơdrong ming hơmet nhôn oei vang chă vei lăng năng tông bơngai jĭ kơna tơ ƀơ̆p, oei tơ jê̆ hăm bơngai jĭ tôch kơ lơ, lơ̆m mă nŏh pă đei hơtăih hăm Covid dăh mă yă kiơ bơih. Đei ‘măng lăng ƀô̆h ŭnh hnam bơngai jĭ lăp oei tơ̆ ‘ngoăih krao điên thoăi păng mơ̆ng ƀak si tơbăt hlôi lôch dăh mă jĭ ăl, ƀak si chĕp mơ̆ng điên thoăi mơ̆ng, tơroi ăn jĭ tôch mơnat.”

Mŏ Trần Thị Thu Thủy hơmet pơ ‘lơ̆ng tơmam drăm hơdrol vă test rĕnh ăn kon pơlei

Hăm mŏ Trần Thị Thu Thủy, bơngai jang khăm hơlen găh Hnam pơgang pơlei tơm Buôn Ma Thuột ‘nŏh tơroi đơ̆ng khei 5/2021 trŭh dang ei, jing dôm khei ‘năr ư̆h kơ kĕ kơ hiơt lơ̆m prăt sơnăm bơ̆ jang pơgang. Tơdrong erĭh sa lơ̆m ŭnh hnam, adoi nhen jơ ‘năr kơ tơdrong jang mơ hoal ‘moi kiơ̆ tơdrong jĭ Covid -19. Pơlei tơm hơnơ̆ng đei lơ bơngai tơpŏh jĭ lơ̆m kon pơlei, păng bơ̆ jang khăm hơlen đĭ đăng kon pơlei, đe mŏ măh hơnơ̆ng krŏng prăt măng vă iŏk đak mŭh khăm hơlen, tơchă dôm bơngai oei tơ jê̆ hăm bơngai jĭ:“Nhôn bơ̆ jang jĭ tôch ai, ư̆h kơ đei jơ ‘năr pơdơ̆h. Mư̆h kơdră kơpal krao mă đơ̆ng dang yơ nhôn năm hloi, găh tơdrong lơ̆m ŭnh hnam ‘nŏh nhôn hơmet ăn mă lăp.”

‘Nao plôih hơmet ao bơ̆ jang păng che gom ƀŏ lăp đơ̆ng rŏng 7 jơ hơnơ̆ng tơ oei lơ̆m labo bơ̆ jang khăm hơlen sơmach jĭ SARS –CoV -2, mŏ Trần Thị Nguyên Hằng bơngai jang khăm hơlen găh Hơnĭh tơm khăm hơklen jĭ jăn dêh char Dak Lăk hăt hot hrŭk ao bơ̆ jang pơgang dơ̆ng kơ yuơ ‘nao sơng iŏk pham đak mŭh vă khăm hơlenh hloi.“Jang tơdrong jang bơ̆n ‘nau jei băt mư̆h chă krŏng măng lơ lau păng bơ̆ jang hơnơ̆ng lơ lau jei pơm ăn jơhngơ̆m bơ̆n rơbơ̆n tơpă mơ̆n, mă lei ba ƀô̆h dôm ŭnh hnam chă pŭ kơ ‘mĭn kon hơ ‘lơ̆p đơ̆ng ataih vĭh glĕh hrat lơ lau, trong hơtăih ‘mi kial hao gre bơbĭt lơ lŏh ‘nŏh dôm tơdrong mă bơ̆n glĕh hrat lăp iĕ ioch đĕch. Ba tơchĕng, dôm tơdrong bơ̆n hơdrin đei hơnhăk ăn rim bơngai sơđơ̆ng jơ hngơ̆m ‘nŏh ba hơdrin jang đĭ jơhngơ̆m hloi.”

Rim drŏ kăn bơ̆ jang Hơnĭh khăm hơlen jĭ, Hơnĭh tơm hơlen jĭ jăn dêh char Dak Lăk bơ̆ jang prăt năr lơ̆m hơnĭh hrĕp

Ƀok Nay Phi La, Kơdră chĕp pơgơ̆r Dơnŏ anĭh vei lăng bơ̆ jang pơgang dêh char Dak Lăk tơbăt, hrei au, khŭl ƀok thây pơgang kơ dêh char hlŏh 6.000 ‘nu bơngai, lơ̆m au đei hlŏh 60% ‘nŏh drŏ kăn. Lơ̆m ‘măng iung jang tang găn jĭ hơbuh Covid-19, dôm bơngai drŏ kăn jang pơgang ư̆h khan hơgei lơ̆m bơ̆ jang, mơ̆ jang kơchăng, hơlen, mă lei oei tơ ƀô̆h hơdăh jơhngơ̆m đon hơlăng kơ đe drŏ kăn mư̆h bơ̆ jang. Gơnơm đe sư, dôm bơngai đei iŏk pham đak mŭh vă khăm hơlen, dôm bơngai jĭ đei vei lăng năng tông, ming hơmet jei sơđơ̆ng jơhngơ̆m hloh dơ̆ng. Dôm khei ‘năr bơ̆ jang tang găn jĭ hơbŭh Covid-19 hăm đe drŏ nglo hlôi glĕh hrat bơih, hăm đe drŏ kăn sa roi glĕh hrat băt dôm yơ dơ̆ng:“Mư̆h đe pơmai ŏh drŏ kăn vang iung jang tang găn jĭ au jei tôch mơmat tat lơ̆m tơdrong erĭh sa kơ đe hăp. Nhen lĕ hŭt tơ̆ rŏng dôm tơdrong vei lăng năng tông kon hơ ‘lơ̆p lơ̆m ŭnh hnam vă iung jang tơgŭm ăn tang găn jĭ hơbŭh, ‘nau jing tơdrong kăl hôn bơnê kơ đe drŏ kăn lơ̆m hơnĭh jang pơgang. Lơ̆m khei năr kơnh, hơnĭh bơ̆ jang pơgang đei kơthơ krao hơvơn rim khŭl, rim hơnĭh jang, rim bơngai vang chă hơlêm tơgum ăn rim pơmai ŏh lơ̆m khei ‘năr kơnh. Kơ yuơ ‘nau jing dôm đe pơmai ŏh hlôi plang jơhngơ̆m đon tôch ai ăn bơ̆ jang tang găn jĭ Covid ‘măng mă au.”

Lơ̆m ‘măng tang găn jĭ hơbŭh Covid-19 oei mơnat tat đunh đai, dôm bơngai drŏ kăn jang pơgang oei tŏk bŏk prăt măng năr kơrŭn đĭ jơhngơ̆m atŭm hăm rim khŭl jang vă tơpŭh hŭt jĭ hơbŭh vă pơtrŭh tơdrong erih sa sơđơ̆ng ‘lơ̆ng hơ iă đêl so ăn kon pơlei pơla.

            Bơngai chĭh: Nam Trang

Tơblơ̆ nơ̆r: Amazưt