VOV4.Bahnar - Khei ‘năr âu ki, tơ̆ dêh char Dak Lak hlôi đei 82 ‘măng krao điên thoăi apĭnh hre jên ŭnh điên đơ̆ng kon pơ lei, dăh mă athei pĭnh hơ len hơ dăh dăr hơ len tơ drong tơ tông klĕ ŭnh điên... Tơ drong hơ nơ̆ng đei dôm ‘măng krao điên thoăi apĭnh jên păng tơ hli kăt ŭnh điên pơm ăn lơ bơ ngai bơ ngơ̆t tơ tăm. Anih jang kơ pal roi tơ băt kon pơ lei athei kơ chăng hăm dôm ‘măng krao điên thoăi hơ lĕnh vă veh ver kơ đei hơ lĕnh pơ dăr.

Ƀok Trần Văn Nho – hnam oei tơ̆ trong iĕ 447 trong Lê Duẩn, phường Ea Tam, pơ lei tơm Buôn Ma Thuột, tơ băt, khei 6 âu ki, ƀok iŏk đei ‘măng krao đơ̆ng kơ sô̆ điên thoăi hlĭch athei kla jên ŭnh điên hloh 370 rơ bâu hlak jên. Yua kơ hlôi nôp jên ŭnh điên bơ̆ih kơ na sư băt kơ hơ lĕnh, krao truh điên thoăi tơm ŭnh điên vă hơ len lăng hơ dăh ‘noh băt ‘noh jĭ 1 trong hơ lĕnh pơ dăr:

“Đe sư akhan ‘noh ŭnh hnam nhôn tŏk bŏk hre jên ŭnh điên păng athei kla jên hơ drol kơ 4 jơ kơ sơ̆ vă hoei kơ kăt ŭnh điên. Ĭnh apĭnh ‘noh dang ei kla jên thoi yơ ‘noh đe sư khan đơ̆ng rŏng iŏk đei tin nhắn ‘noh pơ̆ih lơ̆m trong đe sư pơ tho vă tơ roi tơ băt kơ sô̆ tơ moi đang kơ ‘noh gô đei pơ tho kla jên. Ĭnh ƀôh pha đei tơ drong kiơ ‘noh kơ na pĭt kơ măy. Đang kơ ‘noh ĭnh krao điên thoăi ăn Điên thoăi tơm kiơ̆ kơ sô̆ 19001909 vă tơ roi, ‘noh bơ ngai jang rôp điên thoăi tơ roi ‘noh jĭ bơ ngai hơ lĕnh pơ dăr.”

Kŭm iŏk đei điên thoăi krao apĭnh jên ŭnh điên lei lăi thoi noh ‘năi, ƀok Trương Văn Sơn, oei tơ̆ thôn 11, xăh Hòa Phú, pơ lei tơm Buôn Ma Thuột, tơ roi:

“ Ŭnh hnam nhôn pơ ma atŭm ‘noh kŭm đei khei tam mă tom nôp jên ŭnh điên, ‘noh kŭm đei kơ sô̆ điên thoăi krao truh tơ tă ‘noh năm tơ̆ kŏng ti nôp jên. Đŏng rŏng ‘noh ŭnh hnam hlôi nôp jên bơ̆ih mă lei ‘noh đei điên thoăi krao apĭnh dơ̆ng, mă lei ƀôh kơ sô̆ điên thoăi ‘noh hlĭch. Ŭnh hnam kŭm tơ roi hăm kŏng ti ‘noh đĭ nôp jên bơ̆ih liơ mă đei điên thoăi pơ dăr thoi noh”.

Dôm kơ sô̆ điên thoăi hlôi krao truh kon pơ lei Dak Lak vă hơ lĕnh pơ dăr

Kiơ̆ chih iŏk đơ̆ng Anih vei lăng tơ moi yua ŭnh điên tơ ring tŏk bŏk, đơ̆ng khei 5 truh dang ei, tơ̆ dêh char Dak Lak hlôi đei 82 ‘nu kon pơ lei iŏk đei đe krao đơ̆ng kơ sô̆ điên thoăi hlĭch, chă krao kơ dih ‘noh bơ ngai jang găh ŭnh điên athei kla jên ŭnh điên; dăh mă bơ ngai kơ anih jang kŏng an tŏk bŏk dăr hơ len tơ roi tơ moi tơ kông klĕ ŭnh điên... Bơ ngai krao điên thoăi athei kla jên dăh mă tơ roi hơ dăh hloi tơ dăh ưh kơ đei kăt ŭnh điên. 1,2 ‘nu bơ ngai oei pơ tho tơ moi pơm kiơ̆ đơ̆ng đe sư gơ̆ih lơ̆m điên thoăi kiơ̆ tin nhắn.

Kiơ̆ đơ̆ng hơ len lăng hơ dăh, Kŏng ti ŭnh điên Dak Lak sơ kơ̆t hơ dăh ‘nâu adoi jing dôm điên thoăi krao hơ lĕnh, lơ̆m noh đei lơ kơ̆l kơ sô̆ ư̆h kơ sĭ tơ̆ Việt Nam. Dôm ‘măng krao điên thoăi âu vă hơ lĕnh pơ dăr tơ moi, tơ tông iŏk kơ tơ̆ng ang vă tơ gar iŏk kơ sô̆ jên lơ̆m tai khoan điên thoăi, tai khoan anih jang mong jên... Tơ tă kơ kon pơ lei kăl kơ chăng mư̆h iŏk dôm ‘măng điên thoăi apĭnh jên vă veh ver kơ hơ lĕnh pơ dăr, ƀok Hà Văn Chương – Phŏ kơ dră vei lăng kŏng ti ŭnh điên Dak Lak, tơ roi rơ đăh:

Kŏng ti ŭnh điên Dak Lak tơ tă truh tơ moi: mă mônh h tơ moi lăp kla jên ŭnh điên kiơ̆ rim kênh tơ pă dăh mă rim anih thu tơ gŭm nhen hlôi pơm kiơ̆ dôm khei hơ drol. Mă 2 ‘noh tơ moi athei mă pơ ‘lơ̆ng mư̆h tơ roi tơ drong kơ tơ̆ng kơ dih ăn kơ bơ ngai hlĭch. Mă 3 ‘noh dôm tơ drong kơ tơ̆ng ang găh pơ vih pơ văn ŭnh điên ‘noh lăp sơng iŏk kiơ̆ kênh joăt joe đơ̆ng anih jang ŭnh điên đơ̆ng sơ̆ truh dang ei mă ư̆h kơ kiơ̆ điên thoăi; mư̆h kăl tơ gŭm ‘noh tơ moi gơ̆h krao truh Anih vei lăng tơ moi 19001909 vă anih jang ŭnh điên tơ gŭm.

Kon pơ lei kăl kơ chăng mư̆h iŏk đei ‘măng krao đơ̆ng dôm kơ sô̆ điên thoăi hlĭch

Khei ‘năr âu ki, trong hơ lĕnh pơ dăr kiơ̆ điên thoăi hlôi đei ƀôh tơ̆ lơ tơ ring lơ̆m teh đak. Rim ‘măng krao điên thoăi hơ lĕnh hơ năn âu đei pơm kiơ̆ sim điên thoăi ư̆h kơ yua, dăh mă dôm phần mềm pơ̆ih kơ dih. ‘Nâu jĭ tơ drong hơ lĕnh pơ dăr kơ măy kơ mŏk  ‘nao păng tam mă kĕ sek phak pơ tôch. Yua thoi noh, kon pơ lei kăl hơ tŏk ‘lơ̆ng đon kơ chăng tơ̆ hơ năp dôm ‘măng krao điên thoăi apĭnh jên hre, athei dăr hơ len...., ư̆h khan lăp hơ drô̆ jên ŭnh điên mă pơ đĭ hloi dôm hla ar răt tơ mam nai hloi vă veh ver kơ đei tơ gar iŏk mŭk drăm.

VOV Tây Nguyên

Thuem: Tơ blơ̆