VOV4.Bahnar - Lơ̆m 2 năr 17 păng 18/7 Dak Lak đei dơ̆ng lơ bơ ngai tơ pŏh pơ rang jĭ SARS –CoV -2. Hơ mơt ưh kơ măh tơ mam xa lơ̆m khei ‘năr ưh ăn yak vih vât lơ lơ̆m tơ pôl kiơ̆ tơ drong tơ chơ̆t 15 đơ̆ng Khul kơ dră tĕh đak, kơ na kon pơ lei lơ̆m plt Buôn Ma Thuột pơ jei băl năm răt mong tơ mam yoa, pơm ăn kơ jă 1,2 tơ mam tơ̆ lơ kơ chơ tŏk tôch dêh păng ưh kơ măh.

Ƀok Đoàn Ngọc Thượng, Phŏ Kơ dră vei lăng kon pơ lei plt Buôn Ma Thuột ăn tơ băt: plt hlôi pơ jing trong pơ truh tơ mam xa păng tơ mam yoa kăl ăn kon pơ lei bơih. Hơ dai hăm ‘nŏh, plt kŭm tơ lĕch lơ trong pơ truh tơ mam tơ dăh đei tơ drong jĭ kơ nê̆ hlŏh vă pơ yoa ăn kon pơ lei răt iŏk, ưh ăn đei tơ drong ưh kơ măh tơ mam. Vă pơ truh măh mai tơ mam yoa ăn kon pơ lei, siêu thĭ Co.opmart Buôn Ma Thuột đei trong ‘măn răk lơ tơ mam xa kăl nhen, phe, mi tôm, sŭp kro; tơ mam kơ hôp păng tơ mam sơ ‘ngieu. Atŭm hăm ‘nŏh pơ truh măh mai dôm tơ mam xa hơ drih nhen ‘nhĕm, ka, kơ tăp iĕr, ‘nhŏt lơ kơ loăi.

Anih vei lăng tĕch mơ dro Dak Lak oei hơ tŏk tơ drong dăr lăng vă găn đe hơ tŏk kơ jă tơ mam yoa

Anih vei lăng tĕch mơ dro Dak Lak hlôi pơm hla ar ƀiên ƀan phak 1 hơ nih tĕch mơ dro Bách Hóa Xanh tơ̆ trong Ngô Quyền, phường Tân An, pơ lei tơm Buôn Ma Thuột yua kơ pơm glăi tĕch tơ mam ư̆h kơ pơ klep kơ jă păng tĕch kơ jă măk hloh pơ klep glăi tơ drong hơ găt lơ̆m pơ yan jĭ. Khŭl linh kơ pal hlôi pơm hla ar ƀiên ƀan vă phak kiơ̆ tơ drong hơ găt. Khei ‘năr âu, tơ̆ hơ nih tĕch mơ dro đei lơ kon pơ lei tŏk bŏk răt tơ mam mong răk vă tang găn jĭ Covid – 19,  yua kơ đon tơ chĕng hli tơ tăm ư̆h kơ măh tơ mam lơ̆m khei ‘năr ư̆h kơ ăn yak vih vơ̆t lơ lơ̆m tơ pôl kiơ̆ tơ drong hơ găt 15 đơ̆ng khŭl kơ dră teh đak. Anih vei lăng tĕch mơ dro dêh char Dak Lak hlôi tơ lĕch hla ar athei rim anih jang hơ tŏk loi dơ̆ng dăr hơ len, dăr lăng ư̆h kơ lê̆ đei ƀôh tơ drong mong tơ mam, hơ tŏk kơ jă hăm dôm tơ mam kăl.

Dơ̆ng hăm Thuem: Tơ blơ̆