VOV4.Bahnar - Dêh char Dak Lak tŏk bŏk lơ̆m pơ yan tŏ, lơ hơ găt teh bri tơ̆ Dak Lak đei hơ mơt kơ đei ƀôh ŭnh sa kơ tang. Vă tơ jră, rim tơ ‘ngla bri păng ahih jang kơ pal tơ̆ dêh char tŏk bŏk hơ drin tơ lĕch jang lơ trong jang. Kiơ̆ kơ ƀok Mai Văn Kiện – Phŏ Kơ dră anih jang vei lăng bri ‘long dêh  char Dak Lak, lơ̆m dêh char đei dang 200.000 hek tar bri lơ̆m kơ sô̆ vă jê̆ 500.000 hek tar bri lơ̆m tơ drong tơ roi krê hơ mơt kơ ŭnh sa kơ sô̆ 4 dăh mă rŏ lăng tŏk bŏk đei tơ̆ kơ sô̆ 5.

Chong pơ ‘ngoăih ‘nhet păng kăt hơ leh sơ drai kro tang găn ŭnh sa

Tŏ hang đei tơ dra hơ drol pơ dui đunh trŭh khei 5, hơ mơt kơ ŭnh sa bri gô oei kơ tang hloh dơ̆ng. Anih jang vei lăng găh bri ‘long Dak Lak hlôi jang tơ gŭm ăn kơ Anih vei lăng kon pơ lei dêh char tơ lĕch trong jang tang găn ŭnh sa, pĭt ŭnh sa bri. Athei rim anih jang păng tơ ‘ngla bri gơ var tơ ring lơ hơ nih tơm đei hơ mơt kơ ŭnh sa lơ tơ̆ dôm apŭng nhen: Buôn Đôn, Ea Súp păng Ea H’leo hăm hơ găt teh dang 195.000 hek tar vă akŏm tơ lĕch jang dôm trong jang tang găn hơ mơt kơ ŭnh sa gô đei ƀôh.

Thuem: Tơ blơ̆