VOV4.Bahnar -  Đơ̆ng khei 10 truh dang ei, dêh char Đăk Lăk đei ƀôh lơ bơngai ƀơm jĭ  COVID-19 păng hlôi jing minh lơ̆m dôm “anih hli” găh pơrang jĭ COVID-19 kơ jâ̆p teh đak. Hăm tơdrong hli hlơt đơ̆ng pơrang jĭ, tơdrong jang tang găn păng tơjră jĭ tơ̆ Đăk Lăk hlôi tơbang hơdăh tơdrong tơjruh, mă hăt noh găh bơngai jang, tơdrong xet ngĭm păng tơdrong ƀet vaccine. Dêh char tŏk bŏk oei adrin hơmet dôm tơdrong đei ƀôh âu păng tang găn tơdrong tŏk lơ kơsô̆ bơngai ƀơm jĭ.

          Dêh char Đăk Lăk lơ̆m 'măng mă 4 hơbuh pơrang jĭ Covid hlôi đei ƀôh lơ bơngai ƀơm jĭ hăm jê̆ 5000 ‘nu, kơsô̆ bơngai ƀơm jĭ COVID-19 lơ̆m dôm năr kơ âu. Lơ̆m noh plei tơm Buôn Ma Thuột hlôi tŏk hloh 1 rơbâu 'nu ƀơm jĭ. Lơ̆m kơsô̆ hloh 600 'nu ƀơm jĭ lơ̆m 2 giĕng kơ âu, truh 90% 'nu ƀơm jĭ đei ƀôh lơ̆m pơlei pơla, hơtŏk tơdrong hơbuh jĭ lơ̆m pơlei jing hli pơkăp 4. Ƀok  Vũ Văn Hưng, Kơdră Anih vei lăng kon pơlei plei tơm Buôn Ma Thuột ăn tơbăt, Covid-19 tơ̆ plei tơm dang ei tơnap kơ chơ chă băt bơngai ƀơm: “Dang ei bơngai ƀơm jĭ lơ̆m pơlei pơla ưh kơ băt tơpoh đơ̆ng yơ mă kăl noh tơdrong tơm đơ̆ng bơngai chôt vih đơ̆ng tơring hơbuh pơrang jĭ ưh đei tơroi hơdăh păng ưh đei pơm kiơ̆ pơkăp oei tơklăh tơ̆ hnam. Dang ei chơ chă bơngai F1 noh tơnap kơlih kơsô̆ lang lap. Mă lei plei tơm duh pơjing đei 21 tơring vă chơ chă bơih, đang kơ noh đei khul chơ chă kơ plei tơm dơ̆ng. Đang kơ noh Viê̆n Vê̆ sinh dĭch têh Tây Nguyên duh tơgŭm ăn minh khul jang chơ chă, tơlĕch test lơ̆m jâ̆p plei tơm"

          Kơsô̆ bơngai ƀơm jĭ tŏk lơ lơ̆m kơplăh kơsô̆ bơngai đei ƀet vaccine lơ̆m jâ̆p dêh char Đăk Lăk dang ei oei kơđeh hloh kơ jâ̆p teh đak. Jô̆ truh blŭng khei 11, kơsô̆ bơngai đei ƀet 'măng mă 1 đei 58,6% păng ƀet tôm 'măng mă 2 noh 9,11%. Kơsô̆ bơngai đei ƀet vaccine kơđeh hlôi pơm ăn tơdrong tơpoh lơ̆m pơlei pơla duh nhen hơtŏk tơdrong hrat ăn tơdrong hơmet ming ăn bơngai ƀơm jĭ.

          Ƀok Trịnh Quang Trí, Kơdră Anih jang Hơlen Pơrang jĭ jăn (CDC) dêh char Đăk Lăk ăn tơbăt: Truh năr 30/10, dêh char Đăk Lăk hlôi iŏk đei pơhlom 1 trĭu kơliu vaccine bơ̆ng jĭ COVID-19 đơ̆ng Trung ương. Mưh ƀet đĭ kơsô̆ vaccine âu noh đei ƀet ăn 72% kơsô̆ bơngai ƀet 'măng mă 1 păng tơdrong ƀet bơ̆ng jĭ đei dêh char hơtŏk tenh: “Dôm anih jang y tê̆ xăh phương dang ei noh ƀet pơhlom 200-300 'măng mă 1 ăn xăh lơ̆m minh năr. Kơyuơ noh jâ̆p dêh char lơ̆m minh năr pơhlom 40.000. Akŏp tôm vaccine ƀet đĭ ăh năr 5/11. Atŭm hăm noh, kơchĕng lơ̆m khei 11-2021 gô iŏk dôm vaccine nai. Găh plei tơm Buôn Ma Thuột, pơkăp 100% kon pơlei đơ̆ng 18 xơnăm tŏk tơ̆ kơpal gô đei ƀet tŏ xĕt jat noh 'măng mă 1 vaccine bơ̆ng jĭ COVID-19 adrol kơ năr 15/11/2021."

          Dêh char Đăk Lăk hlôi đei jê̆ 5000 'nu bơngai ƀơm jĭ Covid -19, lơ̆m noh đei 50% kơsô̆ bơngai ƀơm jĭ tŏk bŏk oei hơmet jĭ. Tơrĕk hloh noh, 10 năr kơ âu, kơsô̆ bơngai ƀơm jĭ tơ̆ Đăk Lăk hơnơ̆ng tŏk truh 3 kơsô̆, kơsô̆ bơngai ƀơm jĭ lơ̆m pơlei pơla tŏk lơ hăm lơ anih hơbuh hli hlơt. Kiơ̆ kơ ƀok Nay Phi La, Kơdră Anih jang Y tê̆ Đăk Lăk, mưh pơrang jĭ duh ưh kơ tơjur lơ̆m dôm 'năr truh, noh tơring gô athei akŏm jơhngơ̆m hơmet ăn F0, păng hơbŏ gô kăl truh tơdrong tơgŭm: “Athei tang găn hloi ăh tăl 1 păng tăl 2 noh tơ̆ âu gô tơnap găh khul ƀak sih vang jang tơ̆ hôi sư̆k tĭch cực noh hăm anih jang y tê̆ Đăk Lăk đei pơhlom 30 ƀak sih, noh ưh kĕ axong măh tơdrong kăl, kiơ̆ đơ̆ng noh athei krao hơvơn đơ̆ng Trung ương duh nhen Hnam pơgang Chợ Rẫy păng ăh đei lơ bơngai ƀơm jĭ noh anih jang y tê̆ apinh dơ̆ng tơmam drăm kăl vă pơjing Hnam pơgang Tơdăng đơ̆ng Hnam pơgang plei tơm Hồ Chí Minh, Hnam pơgang Bình Dương đơ̆ng rŏng kơ keh đang xơnong jang vih akŏm hơmŏ ăn tơdrong đei ƀôh kơnê̆ hloh tơ̆ dêh char”

          Lơ̆m 'măng chă hơlen, tơgŭm ăn dêh char Đăk Lăk tơjră pơrang jĭ ăh năr 27/10 âu ki, Khul Kơpal kơ Hnam pơgang Chợ Rẫy duh tơroi găh tơdrong juăt jang, tơdrong hlôh vao hơmet jĭ ăn bơngai ƀơm jĭ COVID-19. Kiơ̆ Tiến sĩ, Ƀak sih Nguyễn Tri Thức, Kơdră Hnam pơgang Chợ Rẫy, Đăk Lăk kăl tơjur kơđeh hloh tơdrong tơpoh lơ̆m anih hơmet jĭ, anih oei tơklăh minh ƀôt; tơjur bơngai ƀơm jĭ hlăm; Vei xơđơ̆ng jơhngơ̆m jăn, bơngai jang y tê̆ păng tơdrong hơvơn vang jang đơ̆ng kon pơlei lơ̆m tơdrong tơjră đunh đai hăm pơrang jĭ COVID-19: “Nhôn pơtruh nơ̆r athei hơtŏk xet ngĭm. Mă ƀar noh hăm tơdrong hơbuh tenh athei hơlen truh anih hơmet jĭ Hnam pơgang tơdăng tŏk pơhlom đơ̆ng 4 truh 5 rơbâu tŏ giơng, đang kơ noh nhôn tơgop nơ̆r hăm Anih jang y tê̆ vih vơ̆t tơ̆ âu tơ̆ to thoi yơ păng dôm trong pơkăp oei tơklăh hăm F1 thoi yơ vă tang găn tơpoh dih băl păng đei dôm tơdrong tơroi vă Anih tơm Y tê̆ păng Khul kơpal teh đak hơtŏk kơsô̆ vaccine vă ƀet bơ̆ng jĭ ăn kon pơlei dêh char Đăk Lăk”

Dêh char Đăk Lăk tŏk bŏk hăt hot tơlĕch lơ trong jang tang găn pơrang jĭ COVID-19 hơbuh lang xă lơ̆m pơlei pơla. Atŭm hăm xơnong jang đơ̆ng jơnŭm pơgơ̆r tơring, anih jang đei tơrĕk, rim 'nu kon pơlei athei pơm kiơ̆ kơjăp dôm trong tang găn păng tơjră pơrang jĭ trŏ ƀlep hăm pơkăp “rim kon pơlei noh minh 'nu linh” lơ̆m “kơdrăn tơjră” pơrang jĭ vă dăh hrôih tang găn pơrang jĭ păng chôt vih hăm tơdrong erih “pơkăp 'nao”.

Lan chih păng pơre nơ̆r