VOV4.Bahnar – Kiơ̆ Anih Pơtho Pơhrăm dêh char Đăk Lăk, dôm tơring lơ̆m dêh char tŏk bŏk hăt hot keh đang tơdrong hơmet ăn xơnăm hŏk ‘nao 2021-2022. Khei năr ki, rim tơring duh hlôi hơlen, hơmet tơmam drăm pơtho hŏk pơhrăm, tơmam yua, tơmam pơxuh ngôi; ming hơmet hnam trưng, lăm hŏk. Mă kăl, lơ̆m khei năr pơrang jĭ  COVID -19 tŏk bŏk oei hơbuh hli hlơt noh tơdrong jang tang găn păng tơjră pơrang păng vei xơđơ̆ng ăn hŏk tro, kang ƀô̆, bơngai pơtho đei tơrĕk mă blŭng.

Vă xơng hloh 400 hŏk tro đơ̆ng 10 lăm mâm non xơnăm hŏk 2021 – 2022, Hnam trưng mâm noh Hoa Ban, xăh ataih yaih Cư K’bang, apŭng xơlam teh Ea Súp hlôi hơmet ming dôm lăm hŏk, hơmet bơ̆ ‘nao kơƀang tang dŏ, hơmet ăn pơxuh pơchơt tơ̆ ‘nguaih, pơ ‘nguaih tôm cham hnam trưng. Kô Nguyễn Thị Hóa – Kơdră hnam trưng tơroi: “Lơ̆m khei năr anih vei lăng kon pơlei xăh iŏk hnam trưng vă bơ̆ anih pơkăp oei tơklăh minh ƀôt tang găn pơrang jĭ, noh hnam trưng pơgenh khei năr chă iŏk bơngai hŏk. Truh năr 20/8 âu ki, ăh Anih vei lăng kon pơlei xăh pơdreo noh hnam trưng chă hơmet ming, pruih pơgang pơlôch xơmach tôm cham hnam trưng. Găh tơmam drăm pơtho hŏk pơhrăm, hnam trưng adoi đei anih jang kơpal hơmet ăn anih pơxuh pơchơ̆t tơ̆ ‘nguaih,  49 kơƀang tang dŏ ‘nao atŭm hăm lơ tơmam drăm nai”. 

Tơ̆ xăh xơlam teh Ea Bung, ƀok thây Nguyễn Thành Đông – Kơdră Hnam trưng THCS Ea Bung ăn tơbăt, xơnăm hŏk 2021 – 2022 hnam trưng đei 220 hŏk tro. Ăh jê̆ đĭ khei 7 âu ki, xăh Ea Bung băt đei 7 ‘nu ƀơm jĭ Covid – 19, tơring athei pơm kiơ̆ Tơchơ̆t 16 đơ̆ng Khul kơpal teh đak vă tang găn păng tơjră pơrang jĭ. Kơyuơ noh, rim tơdrong jang hơmet ăn xơnăm hŏk ‘nao jing dê̆. Đơ̆ng rŏng kơ khei năr pơkăp oei tơklăh, hăm tơdrong tơgŭm đơ̆ng dôm jăl jang, tơdrong hơmet ăn xơnăm hŏk ‘nao adoi keh đang tơnăp: “Yơ̆ng âu ki, hnam trưng đei Anih vei lăng kon pơlei apŭng tơgŭm hơmet 8 lăm hŏk, lơ̆m noh đei 6 lăm hŏk tơ̆ anih 2 tăl păng 2 lăm hŏk ăh hơbon hnam tơ̆ hơla dang ei hlôi keh đang oei truh âu kơnh gô hơmet anih jang ăn hnam trưng. Găh hnam trưng noh hlôi răt tôm tơmam drăm pơtho pơhrăm axong ăn bơngai pơtho păng hŏk tro vă ‘măn pơtho pơhrăm tơnăp hloh. Nhôn duh hlôi tơroi hăm đe mĕ ƀă hŏk tro kiơ̆ zalo, facebook găh tơdrong akŏm năm hŏk đơ̆ng Anih Pơtho Pơhrăm ăh năr 1/9.”

Apŭng xơlam teh Ea Súp dang ei đei 48 hnam trưng hŏk đơ̆ng jăl mâm noh truh trung hŏk phôh thŏng păng pơtho giáo dục thường xuyên. Xơnăm hŏk 2021 – 2022, dôm hnam trưng đei 19.350 hŏk tro. Kiơ̆ kơ ƀok Nguyễn Văn Khóa – Kơdră Anih Pơtho Pơhrăm apŭng Ea Súp, hơmet ăn xơnăm hŏk ‘nao, teh đak axong hloh 12 tih hlj vă ming hơmet tơmam kăl ăn rim hnam trưng.

Truh khei năr âu, dôm hnam trưng hlôi hơmet tôm lăm hŏk, bơngai pơtho dăh mă tơdrong tơlĕch pơtho pơhrăm, kơchăng ăn xơnăm hŏk ‘nao: “Anih Pơtho Pơhrăm apŭng hlôi akŏm pơkăp trong jang gơnơm đơ̆ng hla bar pơgơ̆r đơ̆ng đe kơpal vă tơlĕch jang tôm đe kơdră hnam trưng găh pơtho pơhrăm duh nhen tơdrong tang găn păng tơjră pơrang jĭ. Dôm tơdrong hlôi đei hơmet trong pơkăp jang; pơjing akŏm khul jang tang găn păng tơjră pơrang jĭ vă mơ̆t ăh xơnăm hŏk ‘nao xơđơ̆ng ăn đe pơtho, bơngai jang păng đe hŏk tro”

Ƀok Phạm Đăng Khoa, Kơdră Anih Pơtho Pơhrăm dêh char Đăk Lăk ăn tơbăt, vă hơmet ăn xơnăm hŏk ‘nao 2021-2022, rim hnam trưng hŏk hlôi hơlen, hơmet tôm tơmam hŏk pơhrăm, tơmam pơxuh pơchơt; ming hơmet hnam trưng, lăm hŏk, lăm đŏk hla bar, hnam yô chơgaih, dơnâu đak xŏ nhă; vei xơđơ̆ng hnam trưng, tơmam pơtho pơhrăm đei hơmet tôm kiơ̆ pơkăp Tơdrong pơtho phôh thŏng ‘nao hăm lăm 1, 2, 6; hơlen, axong khul pơtho găh kơsô̆, drơ̆ng minh găh pơkăp păng kloh klĕch găh tơdrong hlôh vao pơtho pơhrăm.

Vă vei xơđơ̆ng ăn tơdrong pơtơm xơnăm hŏk ‘nao 2021-2022 kiơ̆ trŏ khei năr tơlĕch xơnăm hŏk đei Anih vei lăng kon pơlei dêh char tơbang tơlĕch, Anih vei lăng kon pơlei dêh char Đăk Lăk pơkăl Anih vei lăng kon pơlei dôm apŭng, thĭ xăh, plei tơm tơlĕch hơlen kơsô̆ bơngai tŏk bŏk pơm kiơ̆  pơkăp oei tơklăh ăn anih jang y tê̆ mă tơring vei hơlen vă hơmet dôm anih pơkăp oei tơklăh, pơdreo hnam trưng ăn hŏk tro năm hŏk. Ƀok Phạm Đăng Khoa, Kơdră Anih Pơtho Pơhrăm dêh char Đăk Lăk ăn tơbăt, lơ̆m ‘măng pơrang jĭ Covid hơbuh mă 4, Đăk Lăk đei 113 anih Pơtho pơhrăm đei iŏk bơ̆ anih pơkăp oei tơklăh, tơlĕch iŏk pham đak muh vă hơlen, ƀet vaccine. Xơnăm hŏk ‘nao jê̆ truh, pơkăl lơ̆m khei năr âu noh, vei xơđơ̆ng rim tơdrong ăn hŏk tro păng bơngai pơtho lơ̆m mă pơrang jĭ Covid-19 tŏk bŏk hơbuh hli hlơt. Mă hăt noh tơ̆ dôm anih pơtho pơhrăm mă đei iŏk bơ̆ anih jang tơjră pơrang jĭ: “Anih vei lăng kon pơlei dêh char hlôi đei hla bar pơkăp rim tơring pơdơh tơdrong iŏk yua dôm hnam trưng hŏk ‘măn ăn tơdrong jang tang găn păng tơjră pơrang jĭ, vă rim hnam trưng hŏk đei jơ ‘ năr pơ ‘nguaih ming hơmet hnam trưng ăn xơnăm hŏk ‘nao. Nhôn adoi kơdih chă hơlen lăng dơ̆ng, xơkơ̆t dôm hnam trưng kăl ming hơmet, răt tơmam drăm hŏk pơhrăm ăn xơnăm hŏk ‘nao”.

Atŭm hăm noh Anih Pơtho Pơhrăm jang hadoi hăm Anih jang Y tê̆ pơm kiơ̆ tơnăp tơdrong pơ ‘nguaih, pruih pơgang pơlôch xơmach kiơ̆ tơchơ̆t păng pơdreo trŏ nhen xo vă dôm anih pơtho hŏk pơhrăm hơmet ăn tơdrong pơtơm pơm lêh mơ̆t xơnăm hŏk ‘nao, vei xơđơ̆ng ăn hŏk tro, bơngai pơtho ƀơ̆t truh tơ̆ hnam trưng.

Lan chih păng pơre nơ̆r