VOV4.Bahnar – Dôm tơdrong pơrăm đơ̆ng pơrang jĭ Covid 19 hlôi pơrăm tih tên truh mŭk drăm – tơpôl dêh char Đăk Lăk. Chŏng mă hăm tơdrong kơ 'nôh đơ̆ng anih jang Đảng, jơnŭm pơgơ̆r tơring, kon pơlei, Đăk Lăk hlôi đei jơnei kăp gĭt lơ̆m tơdrong jang tang găn păng tơjră pơrang jĭ. Dôm tơring lơ̆m dêh char duh dar deh tơplih athei pơm jang atŭm vă xơđơ̆ng, hơmet mŭk drăm, vei xơđơ̆ng tơdrong pơyua lơ̆m trong jang 'nao.

          Jing 1 lơ̆m dôm tơring đei 22 'nu bơngai ƀơm jĭ Covid 19 tơ̆ thôn 6 păng thôn 7 xăh Vụ Bổn, apŭng Krông Pach lơ̆m 'măng pơrang jĭ hơbuh mă 4, mă lei hăm tơdrong pơgơ̆r jang tơnăp đơ̆ng Thủ tướng Teh đak: “Rim xăh, phương jing anih dơnơm hloh”, Đảng ƀô̆, jơnŭm pơgơ̆r tơring păng kon pơlei xăh Vụ Bổn hlôi tenh kuăng hơlen tang găn pơrang jĭ, pơm trong ăn jang mŭk drăm – tơpôl tơ̆ tơring pơtoi hơtŏk tơ iung. Ƀok Lê Viết Nhượng, Ƀĭ thư Anih jang Đảng, Kơdră Jơnŭm pơgơ̆r jang tang găn păng tơjră pơrang jĭ Covid-19 xăh Vụ Bổn, apŭng Krông Pach, dêh char Đăk Lăk ăn tơbăt: “Xăh hlôi iŏk tơdrong tang găn păng tơjră pơrang jĭ jing tơdrong jang kơsô̆ 1. Đon pơkăp găh pơgơ̆r jang 2 pơkăp hadoi noh tang găn păng tơjră răh pơrang jĭ mă lei atŭm hăm noh duh tơgŭm ăn tơdrong hơtŏk pơm jang. Lơ̆m khei năr âu ki, pơm kiơ̆ tơdrong pơgơ̆r đơ̆ng Thủ tướng noh xăh hlôi keh đang Jơnŭm pơgơ̆r jang tang găn păng tơjră pơrang jĭ lơ̆m khei năr dang ei. Lơ̆m noh tơdrong jang kiơ̆ 2 pơkăp hadoi, pơm trong hiôk ăn kon pơlei pơm jang”

Tơ̆ apŭng Ea Heo, dêh char Đăk Lăk hlôi ƀôh đei lơ bơngai ƀơm jĭ SARS-CoV-2, lơ̆m noh đei lơ bơngai hơbuh jĭ lơ̆m pơlei pơla, pơrăm truh tơdrong pơm jang, tĕch pơdro, axong jang păng tơdrong erih kon pơlei. Đơ̆ng tơdrong pơngơ̆t kơ đon, hiơ̆r jơhngơ̆m mă blŭng, truh dang ei hăm tơdrong vang jang kơjăp đơ̆ng anih jang chĭnh trĭ hăm tơdrong kơ 'nôh đơ̆ng kon pơlei, apŭng Ea Hleo hlôi kĕ tang găn pơrang jĭ, atŭm hăm noh jang đei jơnei lơ tơchơ̆t hơtŏk mŭk drăm – tơpôl 9 khei xơnăm 2021. Truh khei năr âu, apŭng hlôi hơvơn đei 21 tơdrong axong jang lơ̆m tơring hăm kơsô̆ jên chih măt jê̆ 2.500 tih hlj. Kơyuơ noh, atŭm hăm tơdrong vei xơđơ̆ng lơ̆m khei năr pơrang jĭ hơbuh hli, noh xơnong jang vei xơđơ̆ng chĭnh trĭ, hơtŏk mŭk drăm tŏk bŏk đei tôm anih jang chĭnh trĭ, tôm kon pơlei păng anih jang mŭ\k drăm tơrĕk kăp gĭt. Ƀok Vũ Đình Tân, Kơdră Anih jang găh Unh hơyuh đơ̆ng kial Trung Nam – Đăk Lăk 1, anih jang mŭk drăm đei tơdrong pơkăp jang tơ̆ apŭng Ea Hleo ăn tơbăt:  “Dang ei, tơdrong pơkăp jang tŏk bŏk yak ăh khei tơm kơ tơdrong pơdŭ kơmăi kơmŏk păng pơlăp. Hăm tơdrong ming man noh găh anih jang kơdih tơlĕch jang, mă kăl noh dôm anih dơnơm athei man đang ƀê tŏng tôm. Kơyuơ noh, găh hơyuh tô̆ 'mi noh ưh đei ƀơm kiơ ôh truh tơdrong pơlăp kơmăi kơmŏk. Adrô̆ minh tơdrong pơrang jĭ hơbuh hli nhen dang ei noh găh anih jang duh kơdih tơrĕk hăm dôm bơngai juăt jang teh đak đe vă bơ̆ hla bar kăl găh Việt Nam dăh hrôih pơm jang pơkăp oei tơklăh, vei xơđơ̆ng tơchơ̆t đơ̆ng Khul Kơpal teh đak tơlĕch. Atŭm hăm noh đe kang ƀô̆, bơngai jang kơ anih jang pơlăp kơmăi kơmŏk noh tôm adoi băt hơdăh mưh năm jang tơ̆ anih pơlăp kơmăi noh ăh vih tơ̆ anih oei kơ po athei tơroi găh y tê̆ hloi …"

Kiơ̆ kơ ƀok Phạm Minh Tấn, Phŏ ƀĭ thư juăt jang tơ̆ Anih Kơpal dêh char Đăk Lăk noh: pơrang jĭ Covid-19 hơbuh hlôi pơrăm tih tên truh tơdrong erih kon pơlei duh nhen tơdrong hơtŏk tơ iung atŭm kơ tơpôl, lơ̆m noh đei dêh char Đăk Lăk. Mă lei, hăm tơdrong kơ 'nôh hăt hot đơ̆ng tôm Anih jang Đảng, tôm kon pơlei, truh dang ei pơrang jĭ lơ̆m tơring kơ dêh char hlôi, păng tŏk bŏk đei hơlen tang găn. Dôm tơchơ̆t găh mŭk drăm – tơpôl 9 khei kơ âu duh oei hơtŏk pơtêng hăm khei năr âu xơnăm 2020. Hơtŏk mŭk drăm kơ dêh char lơ̆m 9 khei kơâu đei 5,28%. Tơdrong pơyua tơmơ̆t ăn jên mong teh đak lơ̆m tơring đei 5.500 tih hlj, hơtŏ 74,5% tơdrong pơkăp đơ̆ng Hô̆i đŏng kon pơlei dêh char pơjao, tŏk 3% pơtêng hăm khei năr âu xơnăm xơ̆. Mă lei, vă pơm jang đei jơnei dôm xơnong jang kơ xơnăm 2021 kiơ̆ Tơchơ̆t đơ̆ng Anih jang Kơpal kơ dêh char tơlĕch, khei năr truh, dôm jăl jang kơpal tơ̆ tơring, jơnŭm jang tơpôl; dôm anih jang, rim tơring lơ̆m dêh char duh oei pơtoi tơrĕk kơjăp hăm tơdrong đei ƀôh, tơlĕch trong jang hơbĕch hơbal, tơnăp hăm pơkăp khŏm mă jang đei jơnei, tơguăt tơdrong jang tang găn păng tơjră pơrang jĭ hăm hơtŏk mŭk drăm – tơpôl, vei xơđơ̆ng tơpôl teh đak. Ƀok Phạm Minh Tấn, Phŏ Kơdră anih juăt jang Kơpal kơ dêh char Đăk Lăk ră hơdăh: “Pơrang jĭ Covid-19 đei ƀôh lang xă jê̆ 2 xơnăm kơ âu hlôi pơrăm truh hơtŏk mŭk drăm – tơpôl, mă lei bơ̆n duh hơnơ̆ng pơkăp mă blŭng xơnong pơyua tơgăl ăn kon pơlei păng hơnơ̆ng pơm kiơ̆ ƀlep tơdrong pơgơ̆r đơ̆ng Trung ương, đơ̆ng Khul Kơpal teh đak noh pơm jang xơnong “2 pơkăp”, noh akŏm jang hơtŏk răh mŭk drăm – tơpôl, vei xơđơ̆ng răh tơdrong tang găn păng tơjră pơrang jĭ Covid-19 păng dôm tơdrong jang tĕch pơdro nai. Ưh đei pơhơi pơhŏ, ưh đei rơhơi vă pơm thoi yơ vă pơm trong hiôk hloh ăn kơ bơ̆n akŏm jơhngơ̆m vă xơđơ̆ng chĭnh trĭ, hơtŏk mŭk drăm – tơpôl, vei xơđơ̆ng tơpôl erih xa, pơjing anih jang chĭnh trĭ tơnăp lơ̆m jâ̆p dêh char”.

Hăm pơkăp jang đei jơnei  “2 pơkăp hadoi” găh tang găn păng tơjră pơrang jĭ  Covid-19 đei jơnei păng keh đang dôm tơchơ̆t găh hơtŏk mŭk drăm – tơpôl lơ̆m xơnăm 2021, Đảng ƀô̆, jơnŭm pơgơ̆r tơring păng kon pơlei kon kông dêh char Đăk Lăk tŏk bŏk oei tơplih kiơ̆ pơkăp Tơchơ̆t tơbang găh  "Kơchăng erih jang xơđơ̆ng, hơbĕch, hơlen tang găn tơnăp pơrang jĭ Covid-19”.

Lan chih păng pơre nơ̆r