VOV4.Bahnar  – ‘Măng hop akŏm mă 2 Hô̆i đŏng kon pơlei dêh char Đăk Lăk jăl 10, jăl jang 2021- 2026 đei pơgơ̆r lơ̆m năr 12 păng 13/8.

Đei pơgơ̆r lơ̆m khei năr pơrang jĭ Covid 19 hơbuh hli tơ̆ tơring, ‘măng hop akŏm mă âu hlôi đei pơgơ̆r kiơ̆ pơkăp trư̆k tuyê̆n hăm 8 anih tơroh pơdăh um rŭp vă vei xơđơ̆ng ăn tơdrong pơkăp tang găn păng tơjră pơrang jĭ. Tơ̆ hop akŏm âu, Hô̆i đŏng kon pơlei dêh char Đăk Lăk hlôi xơkơ̆t tơdrong đei jơnei jang kiơ̆ pơkăp hơtŏk mŭk drăm – tơpôl, vei xơđơ̆ng tơpôl teh đak lơ̆m 6 khei blŭng xơnăm; dôm xơnong jang, trong jang tơm ăn 6 khei jê̆ đĭ xơnăm 2021. 6 khei kơ âu, mă ƀơm răm đơ̆ng pơrang jĭ Covid-19, mă lei hăm tơdrong akŏm pơgơ̆r jang kiơ̆ “pơkăp hadoi”, tang găn păng tơjră răh pơrang jĭ, jang hơtŏk răh mŭk drăm – tơpôl, kơjă tơmam drăm lơ̆m dêh char (GRDP – kơjă pơtêng hăm xơnăm 2010) duh oei đei hloh 22.200 tih hlj, tŏk 9,11%. Tơdrong pơyua ăn jên mong đei 3.595 tih hlj, tŏk 11,5% pơtêng hăm khei năr âu xơnăm xơ̆; dôm tơdrong jang joh ayŏ - tơpôl đei vei xơđơ̆ng; dôm trong pơkăp pơyua ăn tơpôl đei tơrĕk jang kiơ̆; tơdrong erih kon pơlei đei vei xơđơ̆ng.

Tơ̆ hop akŏm, rim bơngai tang măt tơgop nơ̆r găh trong tơlĕch jang kơ dôm khei jê̆ đĭ xơnăm 2021; pơma đam, hơlen dôm tơchơ̆t đei tơrĕk truh hơtŏk mŭk drăm – tơpôl dêh char Đăk Lăk 5 xơnăm truh. Tơ̆ tôm 8 anih tơroh pơdăh um, adrol kơ năm hop akŏm mă 2, Hô̆i đŏng kon pơlei dêh char Đăk Lăk jăl 10, rim bơngai tang măt đei test renh hli ƀơm SARS – CoV2 păng đei axong anih oei ataih băl, chô̆ che gom ƀŏ vă pơm kiơ̆ pơkăp tang găn păng tơjră pơrang jĭ.

Lan chih păng pơre nơ̆r