VOV4.Bahnar - Leng gong năr 30/7, dêh char Dak Lăk hlôi sơng vă jê̆ 900 ‘nu bơngai jang đơ̆ng Dồng Nai brŏk. ‘Nau ‘măng sơng hơvơn kon pơlei mă blŭng kơ Dak lăk. Hloh Test rĕnh, đei 4 ‘nu bơngai đei tơpŏh jĭ SARS-CoV-2, rim tơdrong jang pơgang tŏk bŏk iung jang vă tơchă ƀô̆h bơngai tơpŏh jĭ.

Vă jê̆ 900 ‘nu bơngai jang brŏk trŭh tơ̆ Gơng 14, Trong glung 14 păng đei Kanh sat vei lăng trong nơnăm dêh char Dak Lăk sơng, ba brŏk vă pơm hla bơar kăl hlŏh

Vă jê̆ 900 ‘nu bơngai jang tơ̆ Đồng Nai au hiong tơdrong jang kơ yuơ jĭ hơbŭh Covid-19 pơrăm păng ‘mĕh vă hao gre bơbit brŏk tơ̆ Dak lăk. Dôm kon pơlei ‘mĕh vă brŏk hlôi chĭh hơnăn hăm dơnŏ anĭh bơ̆ jang dêh char Đồng Nai păng dang yơ test rĕnh ưh kơ đei ƀôh tơpŏh jĭ Covid-19 ‘nŏh mă gơ̆h vĭh vă sơđơ̆ng ăn hoei chă dơ̆ng gô tơ̆ rim hơnĭh gak tang găn jĭ. Đơ̆ng rŏng ‘nŏh Kanh sat vei lăng trong nơnăm păng khŭl bơ̆ jang đei khŭl vei lăng sơđơ̆ng, khŭl kŏng ang hinh sư̆, khŭl ƀok thây pơgang kơ dêh char Đồng Nai ba trong yak vă jê̆ 400km. Lơ lŏh, ‘nau măng mă blŭng dêh char Dak Lăk pơgơ̆r sơng hơvơn kon pơlei brŏk đơ̆ng tơring đei jĭ. Hơdrol kơ ‘nŏh, dêh char jei hlôi ƀô̆h lơ kon pơlei oei tơ̆ pơlei tơm Hồ Chí Minh, Bình Dương păng rim dêh char găh Pơbăh brŏk kơ dĭh hăm gre bơbĭt.

Tơblơ̆ nơ̆r: Amazưt