VOV4.Bahnar - Kơsơ̆ năr 18/10, ƀok Lê Quang Bất - Kơdră chĕp pơgơ̆r Dơnŏ anĭh vei lăng kon pơlei tơring Ea Tul, apŭng Cư M’gar (Dak Lăk) sơkơ̆t hơdăh, lơ̆m tơring hlôi đei tơdrong glơ̆k kơ đak pơm ăn ƀar ‘nu hŏk tro drŏ nglo lôch.

Tang măt ăn Dơnŏ anĭh vei lăng kon pơlei tơring Ea Tul, apŭng Cư Mgar dêh char Dak Lăk năm hơpong, hơlêm jơhngơ̆m đon păng pôk tơmam drăm ăn ŭnh hnam đe mon

Bơngai glơ̆k kơ đak ‘nŏh mon Y Tiêm Mlô, 11 sơnăm păng Y Zeam Niê, 8 sơnăm, oei lơ̆m Buôn Tu, tơring Ea Tul, apŭng Cư M’gar, dêh char Dak Lăk. Pơ đĭ măr sư tŏk bŏk hŏk tơ̆ Hnam trương jăl kơđĕh Phan Chu Trinh, tơring Ea Tul, apŭng Cư M’gar, dêh char Dak Lăk. Ƀok Lê Quang Bất tơbăt, Y Tiêm hăm Y Zeam pơtơm dĭh băl năm chă ngôi tơ̆ dơnau Ea Triă, tơring Ea Tul trŭh gơmăng ư̆h kơ brŏk. Lăng ư̆h kơ ƀô̆h kon brŏk, ŭnh hnam đe mon năm tơchă lơ hơnĭh. Trŭh pơgê năr 18/10, rim bơngai mă ƀô̆h hơbĕn ao Y Tiêm hăm Y Zeam lê̆ tơ̆ kông jĭh dơnau Ea Triă kơna krao hơvơn lơ bơngai vang jur chă chă lơ̆m đak dơnau. Đơ̆ng rŏng 1 jơ tơchă, rim bơngai hlôi hiŏng hơtŏk akau bre mon tŏk tơ̆ kông. Lăp đơ̆ng rŏng đei tơdrong, kơdră tơring hlôi năm hơlêm, apĭnh jet gia, năm hơpong păng tơgŭm djru ăn ŭnh hnam chă pơdong groong ƀŭ bre mon. Tơdrong glơ̆k kơđak pơm ăn lôch răm oei ƀô̆h hơnơ̆ng hăm đe hơ iŏh tơ̆ rim dêh char Tây Nguyên, jing tơ ƀô̆h tơbăt ăn rim ŭnh hnam, rim bơngai păng tơpôl kơchăng hlŏh dơ̆ng, tơnăp hlŏh dơ̆ng vei lăng năng tông sơđơ̆ng ăn hơ iŏh vă đe hơ iŏh hoei đei glơ̆k kơ đak.

Tơblơ̆ nơ̆r: Amazưt