VOV4.Bahnar - Dôm dêh char Tây Nguyên pơ ma atŭm păng Dak Lak pơ ma adrô̆ hlôi mât lơ̆m pơ yan ‘mi. Mă lei tơ̆ xăh Ea Siên, thĭ xăh Buôn Hồ, dêh char Dak Lak oei tam mă đei ‘mi kiơ, dơ nâu đak hrơ̆ pơm ăn vă jê̆ 2.000 ha ‘long pơ tăm hiong răm păng hlŏh 1.400 unh hnam kon pơ lei ưh kơ măh đak yoa.

Kon pơ lei xăh Ea Siên oei gô chang ‘mi jur

Kơ sô̆ chih jô̆ đơ̆ng xăh Ea Siên ăn ƀôh, pơ yan phang sơ năm 2021, lơ̆m xăh đei vă jê̆ 2.000 ha ‘long pơ tăm lơ kơ loăi; lơ̆m nŏh 1.500 ha ‘long đunh sơ năm nhen chĕh phe, tiu, mắc ca, jrang; oei đei hlŏh 500 ha ‘nŏh bơ̆n ƀa, hơ ƀo, tơ̆h, kơ mưt. 

Kiơ̆ dơ nŏ anih vei lăng kon pơ lei xăh Ea Siên, tơ drong tŏ phang pơ đang tơ̆ xăh đei hơ nơ̆ng lơ sơ năm ‘nâu, dêh hlŏh jĭ lơ̆m pơ yan phang. Mă lei, tŏ phang pơ đang đei tŏk bŏk pơ yan ‘mi nhen hrei ‘nâu ‘nŏh hui kơ đei đĕch. Tŏ phang ưh lăp pơm pơ răm vă jê̆ 2.000 ha ‘long pơ tăm đĕch, mă oei pơm ăn hlŏh 7.500 ‘nu bơ ngai tơ̆ xăh ưh kơ măh đak yoa tôch dêh.

Dơ̆ng: Tơ blơ̆