VOV4.Bahnar - Tây Nguyên hlôi trŭh pơyan ‘mi, mă lei tơ̆ mĭnh ƀar tơring găh apŭng sơlam tĕh đak Ea Sŭp dêh char Dak Lăk hlôi lơ năr au ki ư̆h kơ đei ‘mi pơm ăn phang pơđang kơtang. ‘Năr tŏ kơtang hlôi pơm ăn hlŏh 9.000 ha ‘long pơtăm nhen ƀa, hơƀo, ƀum ƀlang, tơ̆h đei ƀơm răm, đei ‘măng lơ hơgăt tĕh đĭ kro joi.

Kiơ̆ đơ̆ng Dơnŏ anĭh vei lăng Chŏh jang sa păng Atŏk tơ iung tơring tơrang apŭng Ea Sŭp, tơ̆ tơring au tŏ ‘mi kial sơnăm au tôch kơ chrĭh, blŭng pơyan ‘nŏh ‘mi hơnơ̆ng, đơ̆ng rŏng ‘nŏh tŏ pơđang đunh năr hloi pơm ăn hlŏh 9.000 ha ‘long pơtăm đei ƀơm răm kơtang, akŏm lơ tơ̆ ƀar tơring ‘nŏh tơring Cư K’Bang păng Cư Mlan. Apŭng măh pơm hla bơar apĭnh tơgŭm djru ăn kon pơlei hiong răm đơ̆ng tŏ phang pơđang au. Găh đunh đai kăl đei mĭnh pơnơ̆t đak tĭh vă tơgŭm sơđơ̆ng chŏh jang sa.

Tơblơ̆ nơ̆r: Amazưt