VOV4.Bahnar - Kơ sơ̆ ‘năr (22/8), ƀok Lê Thái Dũng - Bí thư Đảng apŭng Cư Kuin, dêh char Dak Lak tơ băt, Khŭl chĕp kơ̆l pơ gơ̆r Anih jang Đảng apŭng Cư Kuin hlôi hop akŏm păng tơ lĕch tơ drong tơ chơ̆t pơ dơh ‘mơ̆i kơ chư̆k Bí thư Đảng xăh Dray Bhăng hăm ƀok Vũ Duy Tấn. Kiơ̆ kơ ‘noh, ƀok Vũ Duy Tấn hlôi năm hơ met pơ ‘lơ̆ng tơ drong ŭnh hnam tơ̆ apŭng Krông Ana (dêh char Dak Lak) lơ̆m khei ‘năr đĭ đăng apŭng Cư Kuin tŏk bŏk pơm kiơ̆ ư̆h kơ ăn yak vih vơ̆t lơ̆m tơ pôl tang găn jĭ Covid-19 kiơ̆ tơ chơ̆t 16 đơ̆ng Thủ tướng teh đak mă lei ư̆h kơ tơ roi tơ băt ăn kơ dră kơ pal, ư̆h kơ apĭnh phep Anih jang Đảng apŭng.

Yua thoi noh, Khŭl chĕp kơ̆l pơ gơ̆r Anih jang Đảng apŭng Cư Kuin hlôi athei pơ dơh ‘mơ̆i kơ chư̆k Bí thư Đảng xăh Dray Bhăng hăm ƀok Vũ Duy Tấn, khei ‘năr pơ tơm đơ̆ng ‘năr 21/8. Tơ drong vei lăng đei pơ jao ăn kơ ƀok Mai Văn Tào, phŏ Bí thư Đảng xăh Dray Bhăng, vei lăng lơ̆m khei ‘năr ƀok Tấn đei ăn pơ dơh đơ̆ng ‘năr 21/8 ding truh Khŭl chĕp kơ̆l pơ gơ̆r Anih jang Đảng apŭng hơ lên lăng, pơm hơ dăh hơ năp jang tơ pôl, kơ dih lơ̆m tơ drong bơ ngai chĕp kơ̆l đảng ư̆h kơ pơm jŭk yŭk trong hơ lâu lơ̆m tơ drong jang tang găn jĭ hơ buh.

Thuem: Tơ blơ̆