VOV4.Bahnar - Kơ sơ̆ (14/9), Dơ nŏ anih vei lăng kon pơ lei dêh char Dak Lak tơ lĕch hla ar chih pơ tho tơ ƀôh trong pơ gơ̆r pơ tho hŏk lơ̆m khei ‘năr đei jĭ COVID-19 oei tôch hơ mơt hrei ‘nâu. Kiơ̆ kơ ‘nŏh, hăm tơ ring đei chih tơ băt jĭ “tơ ring dreng”, hŏk tro hŏk jăl 2, jăl 3 păng dôm anih pơ tho tơ drong jang pơ gơ̆r hŏk kơ tă tơ̆ hnam hŏk hăm nơ̆r athei đe thây kô, hŏk tro găh tơ ring dreng ‘năi; jăl 1 pơ tho hŏk kiơ̆ trong trư̆k tuyê̆n, hŏk lơ̆m tivi păng pơ jao ƀai hŏk.

Hơ drô̆ hăm hŏk tro lăm 1, lăm 2 ‘nŏh pơ tho hŏk lơ̆m tivi păng ưh đei pơ gơ̆r pơm ƀai kiêm tra, châm hơ len năng lơ̆m khei ‘năr âu, mưh hŏk tro năm hŏk hơ lơ̆k dơ̆ng ‘nŏh athei pơ gơ̆r ôn ƀai adrol kơ pơm ƀai kiêm tra, châm hơ len năng kiơ̆ khei. Hơ drô̆ jăl mâm non pơ dơ̆h hŏk truh đei nơ̆r tơ băt plơ̆ng.

Anih vei lăng pơ tho pơ hrăm dêh char Dak Lak tơ tă ăn dôm hnam trưng, mưh vă tơ lĕch trong pơ tho, hŏk athei roi tơ băt păng pơ tho ăn hŏk tro, mĕ ƀă hŏk tro rim tơ drong găh kơ măy kơ mŏk vă iŏk yoa pơ ‘nhŏ ăn tơ drong hŏk pơ hrăm; trong pơ tho hŏk, ƀai hŏk; trong pơm ƀai kiêm tra, châm hơ len păng dôm tơ drong hơ găt hŏk pơ hrăm hăm rim tơ drong pơ tho pơ hrăm.

Dơ̆ng: Tơ blơ̆