VOV4.Bahnar - ‘Năr 6/6, Anih jang vei lăng pôk rơ̆ih xăh Cư San, apŭng M’Drak, dêh char Dak Lak hlôi pơ gơ̆r pôk rơ̆ih dơ̆ng bơ ngai tang măt Jơ nŭm pơ gơ̆r kon pơ lei xăh, jăl jang 2021-2026 tơ̆ 3 anih pôk rơ̆ih ‘noh thôn 9, 10, 11. Tơ drong tơm pơm ăn pôk rơ̆ih dơ̆ng ‘noh yua kơ ‘năr 23/5/2021, tơ̆ pêng anih pôk rơ̆ih kơ sô̆ 9, 10, 11 kơ xăh Cư San đei kơ sô̆ bơ ngai tăh hla năm pôk tam mă iŏk đei kơ sô̆ 50% akŏp kơ sô̆ bơ ngai tăh hla chih lơ̆m hơ năn.

Dak Lak pơ gơ̆r pôk rơ̆ih dơ̆ng bơ ngai tang măt Jơ nŭm pơ gơ̆r kon pơ lei xăh, jăl jang 2021-2026

Chih iŏk tơ̆ 3 anih pôk rơ̆ih tơ drong pôk rơ̆ih pơ gơ̆r tơ păt, ƀlep khôi luơ̆t. Tơ̆ dôm anih pôk rơ̆ih dơ̆ng, Anih vei lăng kon pơ lei xăh Cư San hơ met bơ ngai jang pơ gang bơ̆ jang, pơ tho bơ ngai tăh hla dơ̆ng hơ tăih băl păng hơ met ăn đak ôp ti, kơ măy pơ tŏ yuh hơ kâu, che gom... vă vei sơ đơ̆ng tơ drong hơ găt găh tang găn jĭ. Pơ tôch, jô̆ truh gơ măng ‘năr 6/6, pêng anih pôk rơ̆ih dơ̆ng bơ ngai tang măt jơ nŭm pơ gơ̆r kon pơ lei xăh Cư San đei kơ sô̆ bơ ngai tăh hla năm pôk nhen tơ̆ hơ la âu: tơ̆ anih pôk rơ̆ih kơ sô̆ 9 đei hloh 88%, tơ̆ anih pôk rơ̆ih kơ sô̆ 10 đei vă jê̆ 74%, tơ̆ anih pôk rơ̆ih kơ sô̆ 11 đei hloh 22%.

Thuem: Tơ blơ̆