VOV4.Bahnar - Tơ̆ hơ năp tơ drong jĭ Covid 19 oei tơ pŏh tôch hơ mơt tơ̆ Dak Lak, ‘năr brei (9-5), Khul kơ dră chĕp kơ̆l Anih Mặt trận tổ quốc Việt Nam dêh char Dak Lak ‘nao đei nơ̆r roi tơ băt găh tơ drong pơ gơ̆r kiơ̆ trong trư̆k tuyê̆n hăm dôm hop akŏm tơ ƀâp bơ ngai tăh hla vă krao hơ vơn ăn bơ ngai lĕch pơ jei pơm bơ ngai tang măt Kuô̆k hô̆i jăl XV dêh char Dak Lak.

Dak Lak pơ gơ̆r tơ ƀâp bơ ngai tăh hla

Lơ̆m 2 năr, 10 păng 11/5/2021, Anih Mặt trận tổ quốc Việt Nam dêh char Dak Lak vă pơ gơ̆r hop akŏm bơ ngai tăh hla kiơ̆ trong trư̆k tuyê̆n vă 15 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV dêh char Dak Lak tơ ƀâp bơ ngai tăh hla tơ̆ 03 anih pôk rơih.

Tơ drong pơ gơ̆r trư̆k tuyê̆n hăm dôm ‘măng hop akŏm tơ ƀâp bơ ngai tăh hla đơ̆ng bơ ngai lĕch pơ jei pơm bơ ngai tang măt Kuô̆k hô̆i jăl 15 dêh char Dak Lak vă pơm ‘lơ̆ng ăn tơ drong pơ gơ̆r tơ ƀâp bơ ngai tăh hla krao hơ vơn ăn tơ drong pôk rơih gơ̆h sơ đơ̆ng ‘lơ̆ng, lăp hăm tơ drong ‘mĕh vă tang găn jĭ Covid 19, atŭm hăm ‘nŏh, pơm ‘lơ̆ng ăn tơ drong đei yoa đơ̆ng dôm bơ ngai lĕch pơ jei kiơ̆ tơ drong hơ găt.

Dơ̆ng: Tơ blơ̆