VOV4.Bahnar - ‘Năr 30/12, dêh char Dak Lak hlôi pơ gơ̆r Hop akŏm pơ tôch 20 sơ năm bơ̆ jang kiơ̆ tơ drong Tơ chơ̆t kơ sô̆ 13/2002 đơ̆ng Khul kơ dră chĕp kơ̆l Trung ương Đảng jăl IX găh hơ nơ̆ng tơ plih ‘nao, jang tŏk păng hơ tŏk tơ drong đei yoa mŭk drăm atŭm, 10 sơ năm jang kiơ̆ luơ̆t Hơp tak xăh (HTX). Tơ roi lơ̆m hop akŏm, hlŏh 20 sơ năm tơ lĕch tơ drong tơ chơ̆t, lơ̆m dêh char hrei ‘nâu đei 608 HTX, lơ̆m nŏh, 390 HTX choh jang xa, 218 HTX ưh đei ƀơm truh tơ drong choh jang xa, chă tơ drong jang ăn 21.000 ‘nu bơ ngai jang, iŏk yoa jô̆ păh lăp tŏk 10 ‘măng.

Mĭnh kơ sô̆ tơ mam ‘lơ̆ng đơ̆ng dôm HTX vang ming pơ dă, roi tơ băt tơ mam OCOP Dak Lak

Pơ ma lơ̆m hop akŏm, ƀok Nguyễn Đình Trung, Kơ dră jang lơ̆m Trung ương Đảng, Bí thư đảng dêh char Dak Lak athei rim anih jang kơ pal, tơ ring tơ rang lơ̆m dêh char hơ nơ̆ng hơ tŏk tơ drong tơ roi tơ băt, krao hơ vơn vă pơ hlôh đon găh tơ drong jang mŭk drăm atŭm, HTX, tơ tom hơ met pơ ‘lơ̆ng dôm tơ drong mơ mat tat, tơ hlăk tăk, pơ jing tơ drong ‘lơ̆ng hlŏh ăn HTX jang tŏk. Pơ jing lơ trong jang mŭk drăm atŭm chăl ‘nao mă lăp hăm tơ drong jang kơ măy kơ mŏk 4.0.

Dơ̆ng: Tơ blơ̆