VOV4.Bahnar - Pơ lei tơm Buôn Ma Thuột gô hơ nơ̆ng pơm kiơ̆ ăn oei hơ drô̆ lơ̆m tơ pôl kiơ̆ tơ drong tơ chơ̆t 16 đơ̆ng Thủ tướng teh đak 7 năr dơ̆ng, jô̆ đơ̆ng tŏk bŏk măng ‘năr 8/8. ‘Nâu jĭ nơ̆r athei ‘nao hloh đơ̆ng dêh char Dak Lak găh tơ mơ̆t yua ư̆h kơ ăn yak vih vơ̆t lơ̆m tơ pôl vă tang găn jĭ Covid-19. Kiơ̆ kơ anih vei lăng kon pơ lei dêh char Dak Lak, hloh 14 năr tơ lĕch jang kiơ̆ tơ drong tơ chơ̆t 16 đơ̆ng Thủ tướng teh đak lơ̆m pơ lei tơm Buôn Ma Thuột păng apŭng Chư Kuin, tơ drong jĭ Covid-19 hlôi đei tơ plih ƀôh ‘lơ̆ng.

Hăm apŭng Cư Kuin, mă đơ̆ng kơ sô̆ bơ ngai jĭ SARS-CoV-2 đei tŏk ră mă lei găh lơ ‘noh lơ̆m hơ nih ăn oei hơ drô̆ akŏm păng tơ ring pơ vang găn. Hăm pơ lei tơm Buôn Ma Thuột, oei đei 1,2 ‘nu bơ ngai tam mă băt hơ dăh đei tơ poh đơ̆ng yơ, kăl hơ nơ̆ng hơ tŏk hrĕnh tơ chă păng pơm kiơ̆ hơ len lăng să. Yua thoi noh, Anih vei lăng kon pơ lei  dêh char Dak Lak tơ chơ̆t, pơ lei tơm Buôn Ma Thuột gô hơ nơ̆ng tơ mơ̆t yua tơ drong tơ chơ̆t 16 đơ̆ng Thủ tướng teh đak 7 năr dơ̆ng jô̆ đơ̆ng ‘năr 8/8 truh đĭ ‘năr 14/8 sơ năm 2021. Hăm apŭng Chư Kuin, jô̆ đơ̆ng tŏk bŏk măng ‘năr 8/8 gô tơ mơ̆t yua tơ drong tơ chơ̆t 15 đơ̆ng Thủ tướng lơ̆m 14 năr.

Thuem: Tơ blơ̆