VOV4.Bahnar - Jĭ Covid 19 đei ƀôh krê hơ mơt, tơ drong pơ tho - hŏk pơ hrăm athei vei sơ đơ̆ng jĭ hơ buh hai athei jang đang tơ drong jang tŏk bŏk tơ lĕch ăn kơ rim hnam trưng tơ̆ Dak Lak lơ mơ mat tat, long nol. Kơ chăng, jang ‘lơ̆ng tơ plih pơm lăp jing tơ drong ‘lơ̆ng hơ iă tŏk bŏk đei anih jang pơ tho pơ hrăm Dak Lak jang kiơ̆ vă jang đang tơ drong hơ găt 2 hơ năp jang.

  Đơ̆ng rŏng vă jê̆ 3 giĕng pơm kiơ̆ tơ drong pơ tho hŏk online, kô păng hŏk tro mầm non thị trấn Phước An, apŭng Krông Pac, dêh char Dak Lak chhôk hơ iă, chang gô ƀơ̆t iŏk tơ roi đơ̆ng ‘năr 4-10 hŏk tro “ tơ ring jơk” gơh năm hŏk tơ̆ hnam trưng dơ̆ng. Mă lei lăp đơ̆ng rŏng 1 năr hŏk kơ tă, Anih vei lăng kon pơ lei apŭng tơ chơ̆t rim hnam trưng pơ dơ̆h ‘mơ̆i hŏk kơ tă, tơ plih brŏk hŏk trực tuyến yua kơ đei ƀôh jĭ oei krê hơ mơt. Kô Trần Thị Nga, Kô chĕp kơ̆l hnam trưng mẫu giáo thị trấn Phước An tơ băt, ưh kơ đei ƀôh ưh kơ ê kiơ lơ̆m tơ drong ‘nâu.

        “Hnam trưng mầm non thị trấn ling lang hơ met ‘lơ̆ng vă sơng đe mon truh tơ̆ hnam trưng. Hnam trưng hlôi akŏm pơm rơ goh hnam trưng lăm hŏk, pơ gơ̆r ăn đe kô pơ rŏ hơ met kiơ̆ hơ năn pơ tho. Hnam trưng hlôi tơ roi tơ băt truh đĭ đăng kô pơ tho, kang ƀô̆, bơ ngai jang găh tơ drong jang tang găn jĭ kiơ̆ hla ar athei đơ̆ng kơ dră kơ pal. Pơ gơ̆r ăn dê kô kuey pơm video pơ tho ăn đe mon găh tơ drong băt arih, găh tơ drong jang tang găn jĭ păng dôm pơ tho gĭt kăl tơ̆ lăm hơ ioh 5 sơ năm gơ̆ih truh mĕ ƀă vă kơ mĕ ƀă lăng păng pơ tho đe mon tơ̆ hnam.

        Hăm rim jăl hŏk ‘lŏ ƀiơ̆, nhen: Jăl 2, jăl 3, pơ tho pơ hrăm hơ nơ̆ng, hơ dai hăm tơ drong tơ mơ̆t yua ‘lơ̆ng athei tang găn jĭ, rim hnam trưng hlôi kơ chăng rơ̆ih iŏk trong pơ tho - hŏk, hơ met ming tơ drong pơ tho kiơ̆ rim jơ năr, rim tơ ring mă lăp, đei yua. Ƀok thây Đặng Như Sang, phŏ kơ dră chĕp kơ̆l Hnam trưng hŏk jăl 2 Phước An, thị trấn Phước An, apŭng Krông Pac, dêh char Dak Lak tơ băt:

        “Kơ dră chĕp kơ̆l hnam trưng hlôi hlôh vao đon tơ chĕng “ tơ jră jĭ nhen tơ jră ayăt” ling lang hơ met ‘lơ̆ng tơ plih tơ drong năr ‘nâu tŏk bŏk hŏk kơ tă mă lei tơ dăh đei tơ drong nhôn gô gơh tơ plih jing hŏk trực tuyến hloi. Lơ̆m khei ‘năr hŏk kơ tă nhôn gô vei kơ jăp truh rim đe thây kô pơ tho tơ gĕch jơ năr kăl vă pơ tho akŏm ‘noh thây kô pơ tho gô pơ tho ƀai ƀônh hloh, tơm hloh ăn hŏk tro, oei khei ‘năr athei tơ plih kiơ̆ hŏk trực tuyến ‘noh gô yua dôm tiêt hŏk ‘noh pơ hrăm ming, pơ̆ih să, hơ met ming ƀai hŏk hlôh vao ăn hŏk tro.”

Mĭnh lăm hŏk kơ tă tơ̆ thị trấn Phước An, apŭng Krông Pac

       Oei tơ̆ apŭng hơ tăih hơ tŏ Krông Bông, Jơ nŭm Khŭl apŭng Krông Bông hlôi pơ gơ̆r lăm hŏk “ Khăn hồng”, yua đơ̆ng hơ druh tơ dăm, sinh viên pơ tho hŏk pơ hrăm ăn rim grŭp hŏk tro kơ tă hloi tơ̆ anih oei sa. Hloh 1 khei kơ âu, ‘ngoăih kơ tơ drong hŏk online, 1,2 ‘nu sinh viên kơ hnam trưng Đại học Đà Nẵng, rim năr ‘noh sơng đe hŏk tro jăl 1 brŏk tơ̆ hnam sư vă pơ tho hŏk pơ hrăm. ‘Nâu jĭ đe oh đei tơ drong arih sa mơ mat tat ưh kơ đei kơ măy tĭnh, điên thoăi hơ gei vă hŏk trực tuyến. Sinh viên Nguyễn Bích Phương tơ băt, yua đơ̆ng jĭ hơ buh Covid-19 kơ na sư ưh kơ gơ̆h năm tơ̆ Đà Nẵng, mă athei oei tơ̆ hnam hŏk online. ‘Ngoăih jơ hŏk, sư năm tơ gŭm lăm hŏk “Khăn hồng”.

        “Đei băt tơ̆ apŭng đei tơ lĕch jang lăm hŏk  Khăn hồng vă tơ gŭm đe oh đei tơ drong arih sa mơ mat tat dăh mă ưh kơ đei tơ drong hiôk hŏk online. Inh hlôi chih măt vang jang tơ gop tŏ sĕt vă tơ gŭm đe oh yak hloh hŏk online lơ̆m pơ yan jĭ mơ mat tat âu. Ƀơ̆t ƀôh đe oh đei hŏk hơ nơ̆ng rim năr inh ƀôh tôch chhôk hơ iă ăn đe oh yua kơ hlôi gơ̆h hŏk ƀai tôm”.

        Krông Bông jĭ apŭng hơ tăih hơ tŏ kơ dêh char Dak Lak. Tơ̆ tơ ring ‘nâu, ƀơ̆t jĭ hơ buh covid-19 đei tang găn kĕ, hŏk tro jăl kơ jung hlôi gơh truh tơ̆ hnam trưng hŏk kơ tă. Hơ drô̆ hŏk tro jăl 1 oei athei hŏk online. ‘Nhŏng Bùi Tấn Lợi, Kơ dră Jơ nŭm khŭl apŭng Krông Bông tơ băt: tơ drong pơ gơ̆r dôm lăm hŏk “Khăn hồng” tơ̆ dôm pơ lei pơ la vă tơ gŭm đe oh hŏk pơ hrăm lơ̆m pơ yan jĭ. Kiơ̆ kơ ‘noh, rim bơ ngai jang tơ gŭm năm truh tơ̆ hnam hŏk tro dăh mă akŏm 2 truh 3 ‘nu oh năm tơ̆ hnam sư vă pơ tho hŏk ƀai păng athei pơm kiơ̆ dôm tơ drong hơ găt găh tang găn jĭ Covid-19.

        “’Nâu jĭ lăm hŏk tôch kơ tơ tom tơ gŭm đe oh. Dôm bơ ngai jang tơ gŭm ‘noh jĭ đe buăl hơ druh tơ dăm, khŭl sinh viên, đe thây kô Vei lăng khŭl hơ nhăk kơ măy tĭnh, điên thoăi truh tơ̆ hnam đe oh. Dang ei nhôn tŏk bŏk pơ vei 10 lăm hŏk. ‘Nâu jĭ tơ drong jang ‘nao păng đei tơ drong ‘lơ̆ng lơ̆m khei ‘năr hrei ‘nâu păng tơ̆ hơ năp kơnh.”

Lăm hŏk “Khăn hồng” tơ̆ apŭng Krông Bông

        Tơ̆ hơ năp đei ƀôh ưh kơ ê đơ̆ng tơ drong jĭ hơ buh, Anih vei lăng kon pơ lei dêh char Dak Lak hlôi pơ jao tơ drong gơ̆h jang ăn rim tơ ring tơ chơ̆t kơ dih trong pơ tho mă lăp. Yă Lê Thị Kim Oanh, Phŏ Kơ dră Anih vei lăng găh pơ tho pơ hrăm dêh char Dak Lak tơ băt, anih vei lăng pơ tho pơ hrăm Dak Lak hlôi băt kơ dih tôm dôm tơ drong mơ mat tat păng long nol lơ̆m khei ‘năr jĭ hơ buh oei đei ƀôh krê hơ mơt păng pơ dui đunh. Anih jang hlôi athei Anih vei lăng kon pơ lei dêh char tơ gŭm hơ drol rim trong jang vă anih jang tơ plih trong jang, pơm lăp păng tơ jur dôm tơ drong đei ƀơm ưh kơ ‘lơ̆ng truh pơ tho pơ hrăm, kiơ̆ lơ̆m ưh kơ tơ plih tơ drong hơ găt vei sơ đơ̆ng tơ drong ‘lơ̆ng.

        “ Hơ dai hăm tơ drong rim hnam trưng kơ chăng lơ̆m tang găn jĭ nhen thoi noh bơ̆ih, oei đei tơ drong pơ jing lơ trong jang hŏk pha ra băl vă mưh đei tơ drong kiơ kŭm gơh tơ plih trong pơ tho hŏk lăp tơ drong. Đơ̆ng noh, vă tơ drong tơ lĕch hơ năp jang hơ dai tang găn jĭ hai vei sơ đơ̆ng dôm tơ drong jang pơ tho pơ hrăm đơ̆ng hnam trưng  kiơ̆ ƀlep tơ drong hơ găt hai”.

         Hăm tơ drong kơ chăng vă pơm lăp hăm jĭ Covid 19, anih jang vei lăng găh pơ tho pơ hrăm Dak Lak tŏk bŏk hơ drin vei sơ đơ̆ng tơ drong hơ găt sơ đơ̆ng păng ‘lơ̆ng lơ̆m sơ năm hŏk ‘nao 1 trong ‘lơ̆ng hloh.

VOV Tây Nguyên

Thuem: Tơ blơ̆