VOV4.bahnar - Pơ vang găn 4 pơ lei, bơ̆ jang hơ len lăng đĭ đăng kon pơ lei vă băt hơ dăh f0, f1, hơ tŏk hrĕnh ƀet vắc-xin hăm dôm grŭp đei hơ mơt kơ jĭ lơ, Pơ lei tơm Buôn Ma Thuột, dêh char Dak Lak tŏk bŏk tơ tĕnh tang găn anih đei jĭ covid-19 ‘nao chă ƀôh tơ̆ xăh Ea Kao.

Ƀet bơ̆ng păng hơ len lăng ăn kon pơ lei lơ̆m tơ ring pơ vang găn tơ̆ xăh Ea Kao, Buôn Ma Thuột

Đơ̆ng rŏng chă ƀôh 2 ‘nu jĭ  covid-19 lơ̆m tơ pôl tơ̆ xăh Ea Kao ‘năr 29/9, anih jang pơ gang pơ lei tơm Buôn Ma Thuột, dêh char Dak Lak hlôi tơ tĕnh tơ chă, gơ var tơ ring pơ vang găn dôm plei Cư Bông, Tơng Ju, Cư Lim păng thôn Cao Thắng, hơ vơn bơ ngai jang hơ len lăng vă tơ tĕnh chă ƀôh dôm f0 ăn năm hơ met, oei hơ drô̆ y tế dôm f1.

Gre năm ƀet bơ̆ng tơ̆ xăh Ea Kao, Buôn Ma Thuột

Jô̆ truh pơ gê ‘năr 1/10, tơ̆ Ea Kao hlôi bơ̆ jang hơ len lăng hăm 3500 ‘nu kon pơ lei, băt hơ dăh 18 ‘nu jĭ covid-19. Lơ̆m gơ măng ‘năr 30/9, tơ̆ plei Tơng Ju đei dơ̆ng 30 ‘nu test hrĕnh ăn ƀôh đei jĭ. Dang ei dôm kơ mâu jĭ hlôi gơ̆ih năm hơ len lăng RT-PCR.

Thuem: Tơ blơ̆