VOV4.Bahnar - Tơ̆ hơnăp đei tơdrong jĭ pơrăm kơtang, Dơnŏ anĭh vei lăng kon pơlei dêh char Dak Lăk hlôi chĭh pơtrŭh hla bơar găh tơlĕch jang rim trong jang tang găn jĭ mưh dêh char hlôi đei bơngai tơpŏh jĭ Covid-19.

Kiơ̆ kơ ‘nŏh, dêh char Dak Lăk pơrô̆ athei Kơdră chĕp pơgơr Dơnŏ anĭh vei lăng kon pơlei apŭng, tơring iung jang hơdoi hăm rim hơnĭh jang đei ƀơm trŭh pơrô̆ jang kiơ̆ rim trong jang găn ga vă tang găn jĭ lơ̆m dêh char đơ̆ng tŏk bŏk măng năr 10/5/2021 dĭng trŭh đei tơroi tơbăt ‘nao. Mă hơdăh, pơdơ̆h hloi pơgơ̆r hop akŏm, pơgơ̆r et sa au to hăm hlŏh 30 ‘nu bơngai lơ̆m mĭnh hơnĭh, ‘nĕ gan akŏm lơ bơngai ngoăih hơnih bơ̆ jang tĕh đak, hnam trương hŏk, hnam pơgang; pơdơ̆h hloi rim tơdrong pơgơ̆r akŏm đei hlŏh 30 ‘nu bơngai tơ̆ rim hnam khop, hơkŭm, jang kiơ̆ kơ jăp gom ƀŏ, ôp ti hăm đak pơgang, jang kiơ̆ kơ jăp nơ̆r athei jang kiơ̆ 5K đơ̆ng Dơnŏ anĭh tơm vei lăng jang pơgang.

Tơblơ̆ nơ̆r: Amazưt