VOV4.Bahnar - Dơnŏ anĭh bơ̆ jang pơgang dêh char Dak Lăk hlôi pơgơ̆r ƀet vaccine tang găn jĭ Covid-19’măng mă 3 ăn rim bơngai kăl vă ăn ƀet hơdrol kơ dêh char. Rim bơngai vơ̆r gre yak trong hơtăih đei tơmơ̆t lơ̆m khŭl bơngai ăn ƀet ‘măng mă au, pơih trong hơmŏ dă ƀiơ̆ tơ hlăk tơhlĭn gre chơ tơmam drăm tơ̆ rim dêh char, tơgop jang kiơ̆ trong jang tingrring ‘nŏh: mĭnh păh tang găn jĭ adoi ang hloi pơm sơđơ̆ng mŭk drăm.

Kiơ̆ đơ̆ng CDC Dak Lăk, lơ̆m ‘măng ƀet vaccine Covid-19 ‘măng mă 3 au, hăm 30.000 kơ lieu vaccine đei klăh asong, dêh char gô ƀet ăn rim khŭl kăl vă ăn ƀet hơdrol ‘nŏh bơngai bơ̆ jang lơ̆m tơdrong jang pơgang, bơngai vang bơ̆ jang tang găn jĭ, bơngai jang lơ̆m rim hơnĭh jang kmăi kmŏk pơm tơlĕch tơmam drăm, dơnŏ anĭh mong jên, kơchơ tơm. Tơdrong rim bơngai vơ̆r gre yak trong hơtăih đei ăn ƀet vaccine Covid-19 ‘nŏh đei rim hơnĭh mơdro sa tơ̆ dêh char Dak Lăk hôn bơnê kơtang, hơmŏ gô tơgŭm hơmet pơ ‘lơ̆ng ƀiơ̆ tơhlăk tơhlĭn tơmam drăm tĕch mơdro dĭh băl kơ rim dêh char. ‘Măng ƀet vaccine Covid - 19 ‘măng mă 3 tơ̆ Dak lăk, tơchĕng hơlau đei pơgơ̆r hrơ̆p mĭnh ‘măng lơ̆m năr 22/7. Mă lei kơ yuơ jĭ hơbŭh Covid-19 tơpŏh kơtang, khul ƀok thây pơgang akŏm lơ̆m bơ̆ jang tơchă dôm bơngai oei tơ jê̆ hăm bơngai jĭ, kơna mĭnh ƀar tơring lơ̆m dêh char gô ƀet bơ̆ng năr anai lơ̆m giĕng.

Tơblơ̆ nơ̆r: Amazưt