VOV4.Bahnar - Vă iŏk đei jơnei 30% măt bơngai drŏ kăn ăn pôk tơmơ̆t đei jing bơngai tang măt Jơnŭm vei lăng kon pơlei rim hơnĭh, Jơnŭm khŭl drŏ kăn dêh char Dak Lăk hlôi pơgơ̆r Hop hok pơhrrăm atŏk jơhngơ̆m đon hlô̆h vao ăn drŏ kăn ‘măng mă blŭng chĭh hơnăn pôk tơmơ̆t jang kơdră tang măt Jơnŭm vei lăng kon pơlei rim hơnĭh jăl jang 2021-2026.

Rim bơngai vang năm hop akŏm đei hŏk pơhrăm găh tơdrong tơroi tơbăt tơdrong jang, tơdrong bơ̆ jang, tơdrong gơ̆h jang kơ Jơnum vei lăng kon pơlei păng bơngai tang măt Jơnŭm vei lăng kon pơlei; mĭnh ƀar tơdrong mŭk drăm-tơpôl, jŏh ayŏ oei sa kơ dêh char jăl jang 2016-2021, trong jang jăl jang 2021-2026. Pơtho tơbăt trong jang tơgŭm ăn pơrô̆ pơrôp pôk rơ̆ih, trong tơroi tơbăt tơdrong vă jang kơ bơngai tang măt Jơnŭm vei lăng kon pơlei. Kiơ̆ đơ̆ng Jơnŭm khul drŏ kăn Việt Nam dêh char Dak Lăk, vă hơmet ăn ‘măng pôk rơ̆ih Kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei dêh char Dak Lăk jăl jang 2021-2026, dêh char gô pơgơ̆r 4 lăm pơtho tơbăt tơ̆ rim apŭng Krông Ana, Ea Hleo păng pơlei tơm Buôn Ma Thuột, ăn hlŏh 300 ‘nu drŏ kăn ‘măng mă blŭng vang chĭh hơnăn ăn pôk tơmơ̆t pơm kơdră tang măt Jơnŭm vei lăng kon pơlei rim hơnĭh.

Tơblơ̆ nơ̆r: Amazưt