VOV4.Bahnar – ‘Nao âu,  Thủ tướng Teh đak pơkăl Anih jang găh Trong nơnăm dôm dêh char, plei tơm lơ̆m jâ̆p teh đak pơih “trong jơk” axong pơkăp teh QR Code tơgŭm anih jang mŭk drăm chơ tĕch tơmam choh pơtăm păng dôm tơmam drăm kăl. Đơ̆ng jê̆ đĭ khei 7/2021 truh dang ei, đến nay, Anih jang găh Trong nơnăm dêh char Đăk Lăk hlôi axong hloh 2.000 pơkăp theh QR Code “trong jơk” ăn gre vih vơ̆t vă tơgŭm ăn rim anih jang chơ tơmam drăm duh nhen tơgŭm ăn kon pơlei hiôk hian hloh lơ̆m tơdrong chơ tĕch tơmam choh pơtăm dăh mă dôm tơmam kăl nai.

Ƀok Đặng Quang Điện – Kơdră Hơp tak xăh Gre vih vơ̆t chơ tơmam tơ̆ 63 dêh char, plei tơm Đăk Lăk tơroi, anih jang đei 45 tong gre chơ tơmam choh pơtăm plei ‘long tơ̆ dôm dêh char Tây Nguyên năm truh dôm dêh char găh tu păng anih tơm Hà Nội tĕch tơlĕch. Ăh Hà Nội păng minh ƀar dêh char pơm kiơ̆ pơkăp oei ataih băl lơ̆m tơpôl kiơ̆ Tơchơ̆t 16 đơ̆ng Thủ tướng teh đak, tơdrong chơ tơmam drăm jing adar kơyuơ athei pơm kiơ̆ dôm pơkăp hơlen tang găn păng tơjră pơrang jĭ Covid – 19. Ăh jê̆ đĭ khei 7 âu ki, Anih jang găh Trong nơnăm dêh char Đăk Lăk tơlĕch pơih “trong jơk” axong pơkăp QR Code ăn gre chơ tơmam kơ anih jang mŭk drăm gơh hiôk hian hloh lơ̆m tơdrong chơ tơmam drăm ƀơ̆t truh dôm tơring mă athei pơm kiơ̆ pơkăp oei ataih băl lơ̆m tơpôl kiơ̆ Tơchơ̆t 16 đơ̆ng Thủ tướng teh đak: “Kiơ̆ tơroi đơ̆ng anih jang kơpal găh tơdrong axong pơkăp QR Code chơ tơmam drăm gĭt kăl, nhôn hlôi chih măt lơ̆m mạng, păng hla bar bơ̆ adoi ƀônh mơ̆n. Đơ̆ng rŏng kơ chih măt  “trong jơk” đei axong pơkăp QR Code tơ̆ Anih jang găh Trong nơnăm dêh char Đăk Lăk noh gre nhôn đei axong theh pơkăp gre vih vơ̆t kơtă đơ̆ng rŏng pơhlom 1 - 2 jơ chih măt. Ăh đei theh, tơdrong chơ tơmam drăm gĭt kăl găn dôm anih hơlen pơrang jĭ kơ dêh char duh nhen dôm dêh char, plei tơm nai tenh kuăng păng hiôk hian hloh. ‘Nguaih kơ noh, tôm đe ‘nhŏng oh vơ̆r gre lơ̆m anih jang duh đei tơgŭm test renh Covid - 19 tơ̆ anih hơlen pơrang jĭ Covid – 19 mă ưh đei hiong jên păng hiong lơ jơ ‘năr."

Đăk Lăk đei 6 jăl trong tơm noh: 14 (jăl trong Hồ Chí Minh), 14C, 26, 27, 19 păng 29 pơtoi dôm dêh char Lâm Đồng, Gia Lai, Đăk Nông, Khánh Hòa păng Phú Yên. Dang ei tôm jăl trong tơm adoi đei anih pơgăn hơlen tang găn păng tơjră pơrang jĭ Covid – 19 hơlen bơngai mơ̆t lĕch păng gre vih vơ̆t đơ̆ng dôm dêh char.

Trung tá Đặng Thanh Hòa – Kang ƀô̆ jang hơlen trong nơnăm tơ̆ Anih Kanh sat trong nơnăm Krông Búk, lơ̆m Kŏng ang dêh char Đăk Lăk ăn tơbăt, tơ̆ anih hơlen pơrang jĭ Covid - 19 tơ̆ ‘măng xơlam găh Hlĕch Tu kơ dêh char noh gơng 110 lơ̆m tơring Ea H’leo, apŭng Ea H’leo tơkuh hăm dêh char Gia Lai, rim năr đei kơ hrĕng tong gre vih vơ̆t păng kơ rơbâu ‘nu bơngai mơ̆t lĕch tơ̆ dêh char Đăk Lăk.  Ăh gre chơ tơmam drăm đei hla bar axong pơkăp QR Code oei đei iŏk yua kơyuơ Anih jang găh Trong nơnăm dôm tơring axong ăn noh gô đei axong hơlen adrol găh gre vih vơ̆t tenh kuăng hloh: “Anih Kanh sat trong nơnăm Krông Búk axong tôm kơsô̆ linh gak hơlen măng năr hloi vă vei xơđơ̆ng trong nơnăm duh nhen tơgŭm ăn tơdrong jang tang găn păng tơjră pơrang jĭ Covid – 19. Pơm kiơ̆ pơgơ̆r  “trong jơk” đơ̆ng Thủ tướng teh đak, tôm khul jang gô hơlen pơkăp QR Code, mưh dôm anih jang găh gre vih vơ̆t đei axong tơm păng oei lơ̆m khei năr pơkăp noh nhôn gô axong vih vơ̆t tenh kuăng hloh”

Kiơ̆ kơ ƀok Lê Đình Minh – Phŏ kơdră Anih jang găh Trong nơnăm dêh char Đăk Lăk, pơm kiơ̆ pơgơ̆r đơ̆ng Khul kơpal teh đak duh nhen Anih tơm Trong nơnăm găh tơdrong tơgŭm dôm anih jang găh gre chơ tơmam drăm gĭt kăl, anih jang hlôi tơroi truh dôm anih jang găh gre chơ tơmam drăm tơ̆ Đăk Lăk chih măt vă iŏk axong pơkăp QR Code găh gre vih vơ̆t chơ tơmam drăm gĭt kăl kiơ̆ pơkăp “trong jơk.”

Tơdrong hơlen axong pơkăp QR Code “trong jơk” đei pơm jang hăm dôm phân mêm điê̆n tưh kiơ̆ mạng inernet, hăm hla bar ƀônh hiôk, tenh kuăng păng adrô̆ lơ̆m tam mă đĭ minh pơgê noh đei hơlen axong pơkăp. Ƀok Lê Đình Minh tơroi: “Jô̆ truh khei năr âu nhôn hlôi axong đei 2.036 pơkăp QR Code ăn dôm anih jang găh gre vih vơ̆t chơ tơmam drăm gĭt kăl ăn dôm dêh char, plei tơm lơ̆m jâ̆p teh đak. Anih jang găh Trong nơnăm pơtoi tơroi păng pơkăl dôm anih jang mŭk drăm gre nơnăm chih măt vă đei axong pơkăp QR Code “trong jơk” vă hiôk hian lơ̆m tơdrong chơ tơmam drăm gĭt kăl lơ̆m khei năr pơrang jĭ hơbuh hli hlơt lơ̆m tơring kơ dêh char duh nhen lơ̆m jâ̆p teh đak. Nhôn axong gak hơlen măng năr hloi lơ̆m tôm 7 năr lơ̆m giĕng ăn dôm anih jang găh gre nơnăm. Anih jang mŭk drăm adrô̆ nôp hô sơ trư̆k tuyê̆n noh 1 – 2 jơ đơ̆ng rŏng mưh đei tôm hla bar nhen pơkăp noh nhôn axong hloi vă tơgŭm chă chơ tơmam drăm gơh tenh kuăng hloh”.

Lan chih păng pơre nơ̆r