VOV4.Bahnar - Tơ̆ hơnăp jĭ hơbŭh Covid-19 tơpŏh kơtang tơ̆ lơ̆m kon pơlei, kơsơ̆ năr 25/8, Dơnŏ anĭh vei lăng kon pơlei dêh char Dak Lăk hlôi pơjing tơlĕch ăn Tơdrong tơchơ̆t kơsô̆ 8118 găh pơlăp jang kiơ̆ Nơ̆r athei jang kiơ̆ 16 đơ̆ng Thủ tướng Tĕh đak lơ̆m pơlei tơm Buôn Ma Thuột păng apŭng Krông Ƀŭk đơ̆ng 6 jơ gơmăng năr 26/8 dĭng trŭh đei hla bơar tơbăt dơ̆ng.

Hơnĭh gak tang găn jĭ tơ̆ tơring Cư̆ Êbur, pơlei tơm Buôn Ma Thuột

Kiơ̆ kơ ‘nŏh, Dơnŏ anih vei lăng kon pơlei dêh char pơjao ăn Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Buôn Ma Thuột păng apŭng Krông Ƀŭk tơlĕch jang hơdăh dôm trong vă jang kơhret, sơđơ̆ng ăn bơ̆ jang tang găn jĭ hơbŭh. Drơ̆ng mĭnh nơ̆r pơjao ăn Dơnŏ anĭh vei lăng kon pơlei kơ pơlei tơm Buôn Ma Thuột gơ̆h chă sơng iŏk rim kon jên trŏ ƀlep đơ̆ng kon jên bơ̆ jang tơring ăn iung jang khăm hơlen rĕnh SARS-CoV-2 hăm kon pơlei lơ̆m pơlei tơm vă tơchă ƀô̆h đĭ đăng rim bơngai F0 păng ăn oei hơdrô̆ hloi. Tơ̆ ‘măng jang kiơ̆ oei hơtăih dĭh băl au, pơlei tơm hơnơ̆ng jang kiơ̆ ƀơk ăn hla kơphĭu năm tơ̆ kơchơ ăn kon pơlei, adoi bơ̆ jang kơ hret hlŏh dơ̆ng dăr lăng vă kon pơlei dă ƀiơ̆ lĕch tơ̆ trong.

Tơblơ̆ nơ̆r: Amazưt