VOV4.Bahnar - Anih vei lăng kon pơ lei rim xăh sơ lam kơ dêh char Dak Lak, ‘noh dôm xăh Ia R’vê, Ia Lốp, Ea Bung (apŭng Ea Súp) păng xăh Krông Na (apŭng Buôn Đôn) ‘nao jang hơ dai hăm rim kơ đông linh vei lăng tơ ring sơ lam oei lơ̆m tơ ring pơ gơ̆r tơ lĕch jang tơ drong jang "Đĭ đăng kon pơ lei vang jang tang găn jĭ COVID-19 păng mơ̆t lĕch glăi đơ̆ng teh đak đe”. Kiơ̆ kơ ‘noh, tang măt Khŭl vei lăng kơ dih 51 pơ lei găh 4 xăh sơ lam hlôi kĭ pơ kăp vang jang kiơ̆ tơ drong jang nhen: Hơ nơ̆ng tơ roi tơ băt krao hơ vơn kon pơ lei, bơ ngai jang lơ̆m khŭl pơm kiơ̆ tơ păt trong jang đơ̆ng Đảng păng tơ drong jang tơ gŭm khôi luơ̆t teh đak, tơ drong hơ găt đơ̆ng tơ ring, mă loi ‘noh jĭ khôi luơ̆t găh vei lăng tơ ring sơ lam teh đak, hơ găt găh tang găn jĭ COVID-19. Đĭ đăng rim ŭnh hnam kon pơ lei pơ kăp pơm kiơ̆ Luơ̆t tơ ring sơ lam teh đak, jang kiơ̆ ‘lơ̆ng rim tơ drong tơ chơ̆t, pơ tho đơ̆ng kơ pal găh rim trong jang tang găn jĭ COVID-19, jang kiơ̆ tơ păt tơ drong tơ roi tơ băt y tế, ư̆h kơ akŏm hloh kơ sô̆ bơ ngai hơ găt.

Thuem: Tơ blơ̆