VOV4.Bahnar – Hăm pơrang jĭ Covid-19 tŏk bŏk hơbuh hli, kơ hrĕng sinh viên nganh y tơ̆ Đăk Lăk hlôi chih măt năm jang tơgŭm tang găn păng tơjră pơrang jĭ, tơgop jơhngơ̆m atŭm hăm khul jang y tê̆ tơ̆ tơring tơjră pơrang.

Jê̆ 2 khei kơ âu, sinh viên Trần Ngọc Hải păng khul sinh viên vang jang kơ  khoa Y Dược, hnam trưng Đăi hŏk Tây Nguyên vang jang tơgŭm ăn tơdrong tang găn păng tơjră pơrang jĭ tơ̆ Anih jang y tê̆ plei tơm Buôn Ma Thuột, dêh char Đăk Lăk. Rim năr khul pơtơm jang đơ̆ng 7 jơ minh puơ̆t pơgê păng truh ăh 11 jơ kơmăng, phơ phŏ athei jang truh ăh 4 jơ pơgê pơtơm tôch tơdrong. Tơdrong jang kơ đe xư noh hơlen pơkăp, iŏk đak muh xet ngĭm păng chih tơmơ̆t tơdrong kăl. Trần Ngọc Hải tơroi, kơtơ̆ng Anih jang Y tê̆ hơvơn sinh viên vang năm jang tơgŭm tang găn păng tơjră pơrang jĭ Covid-19, xư hlôi chih măt vang jang păng hlôi 2 ‘măng năm jang tơ̆ anih hơbuh pơrang jĭ: Inh chih măt vang jang tang găn păng tơjră pơrang jĭ đei 2 ‘măng, ‘măng mă blŭng noh inh năm tơ̆ Bình Dương, đơ̆ng rŏng kơ noh chôt vih păng inh chih măt năm jang tơ̆ plei tơm Buôn Ma Thuột. Inh ƀôh minh ‘nu sinh viên y noh ba athei chih măt năm jang tang găn păng tơjră pơrang jĭ vă teh đak dăh tenh đĭ pơrang jĭ, păng ba duh plang đei tŏ xĕt jơhngơ̆m mơlôh ăn kơ teh đak.

Duh nhen Trần Ngọc Hải, đơ̆ng khei 6 truh dang ei hlôi đei kơ hrĕng sinh viên hŏk y khoa tơ̆ Đăk Lăk chih măt vang tơgŭm ăn anih tang găn păng tơjră pơrang jĭ. Atŭm hăm tơgŭm bơngai jang ăn dêh char Bình Dương, sinh viên năm jang oei đei axong tơgŭm jang tơ̆ Anih jang y tê̆ plei tơm Buôn Ma Thuột, Anih jang hơlen pơrang jĭ dêh char, hơtŏk tơgŭm tơdrong chă hơlen chih akŏm, xet ngĭm Covid-19, tơgŭm xet ngĭm renh ăn kon pơlei lơ̆m dôm tơring pơkăp pơvei... Găn hloh dôm tơdrong tơnap kơ tơdrong jang păng tơdrong hiơ̆r ƀơm jĭ, đe sinh viên ƀôh xô̆ lơ̆m đon păng pơ ư pơ ang kơdih kơyuơ hlôi tơgop đei tŏ xĕt jơhngơ̆m ăn tơdrong tơpuh lê̆ pơrang jĭ Covid-19.

‘Nâu duh jing trong hiôk vă rim sinh viên đei iŏk yua tơdrong hŏk po tơ̆ hnam trưng tơmơ̆t lơ̆m tơdrong jang tơpă duh nhen akŏm đei lơ tơdrong vao lơ̆m pơm jang ning mônh kơnh. Sinh viên Nguyễn Thị Thanh Nga, Khoa Y Dược, hnam trưng Đăi hŏk Tây Nguyên tơroi: Kơtă đơ̆ng blŭng ăh Anih Y tê̆ păng hnam trưng hơvơn dôm khul vang jang tang găn păng tơjră pơrang jĭ noh inh hlôi chih măt vang jang vă tơgŭm ăn đe ‘nhŏng pơmai kơ anih jang y tê̆, jô̆ truh dang ei đei 4 khei. Inh duh ‘meh tơgop tŏ xĕt jơhngơ̆m po tơgŭm ăn plei tơm tơpuh lê̆ pơrang jĭ noh ‘meh vă Đăk Lăk duh nhen Buôn Ma Thuột dăh hrôih tơpuh lê̆ pơrang jĭ.

Hăm jơhngơ̆m pran tô̆ chơgăm kơ xơnăm mơlôh, đe sinh viên năm jang adoi bơ̆ jang tơnăp xơnong jang po. Tơdrong tơngăm đơ̆ng đe yĕt đei kon pơlei băt hơdăh păng hmach bơnê. Yă Nguyễn Thị Thanh Hương, Kơdră pơlei Alê A, phương Ea Tam, plei tơm Buôn Ma Thuột ăn tơbăt: Lơ̆m khei năr âu ki noh pơlei inh đei đe oh sinh viên trưng Đăi hŏk Tây Nguyên vih jang hadoi tơnăp, tơngăm, păng tôm xơnong kơ bơngai sinh viên. Lăng atŭm tơdrong tơguăt đơ̆ng pơlei pơla păng đe sinh viên duh tơnăp. Adrol kơ đe sinh viên truh noh inh duh tơrĕk krao hơvơn sinh viên vă rim bơngai băt truh anih vă chă test ăh anih yơ. Đe oh sinh viên kơdih năm truh păng lăng atŭm noh tôch tơnăp, tơngăm hăm kon pơlei.

Mă tơjră hăm lơ tơdrong hiơ̆r mă lei đe sinh viên hŏk y khoa tơ̆ Đăk Lăk duh măng năr hăt hot atŭm hăm khul jang y tê̆ pơm jang tơjră pơrang jĭ. Đe xư adrô̆ hơpơi hăm tơgop tŏ xĕt đơ̆ng kơdih po gô tơgop tơpuh lê̆ pơrang jĭ vă kơdih po păng đe thây pơgang tŏk bŏk oei pơm jang dăh hrôih đei chôt vih hăm unh hnam; dôm tơring xơđơ̆ng gô dar deh đei pơih xă păng tơdrong erih dăh hrôih xơđơ̆ng. Ăh mă pơrang jĭ duh oei hli, noh hăm xơnong jang, đe sinh viên hŏk y khoa duh gô pơtoi năm jang vă tơgŭm ăn anih jang tơjră pơrang jĭ. Sinh viên Nguyễn Đức Duy, Khoa Y Dược, hnam trưng Đăi hŏk Tây Nguyên xơkơ̆t: Lơ̆m khei năr truh mă pơrang jĭ oei pơtoi hơbuh hli noh inh duh oei vang jang. Ăh vang jang noh inh duh hơpơi kơdih po tơgop tŏ xĕt jơhngơ̆m vă tơgŭm tơpuh pơrang jĭ dăh đĭ vă bơ̆n gơh vih erih xa xơđơ̆ng nhen adrol ki.

Đơ̆ng ‘măng pơrang jĭ Covid-19 hơbuh ‘măng mă 4 truh dang ei, dêh char Đăk Lăk hlôi hơvơn đei jê̆ 800 ‘nu sinh viên, kang ƀô̆ păng bơngai jang đơ̆ng dôm hnam trưng đăi hŏk lơ̆m dêh char vă tơgŭm ăn khul jang tang găn păng tơjră pơrang jĭ.

Hăm jơhngơ̆m mơlôh, đon bơnôh xrim, găn hloh dôm tơnap tap, hrat hrĭn păng hli hlơt, đe sinh viên hŏk y khoa hlôi tơhri dăp đon iŏk yua dôm tơdrong đei hŏk pơhrăm, vang jang hăm khul kang ƀô̆, bơngai jang y tê̆ pơm jang xơnong po, tơgop jơhngơ̆m vă tơpuh pơrang jĭ Covid-19 vă dăh hrôih hơ ‘nhăk tơdrong erih gơh vih xơđơ̆ng ‘lơ̆ng.

Lan chih păng pơre nơ̆r