VOV4.Bahnar -  Nhen Radiô Nơ̆r Pơma Việt Nam hlôi tơroi tơbăt, đơ̆ng rŏng 12 sơnăm gô chang, kon pơlei oei lơ̆m tơring tơjê̆ dơnau đak Krông Pach Thượng hlôi đei yông năm oei tơ̆ hơnĭh ‘nao. Rim kơdră chĕp pơgơ̆r tơring tŏk bŏk akŏm pơm sơđơ̆ng tơdrong erĭh sa ăn kon pơlei.

Kiơ̆ vă jang, hlŏh 700 ŭnh hnam hăm vă jê̆ 4.000 ‘nu bơngai oei lơ̆m 3 thôn 9, 10 păng 11, tơring Cư San, apŭng M’Đrăk gô đei yông năm oei tơ̆ hơnĭh oei ‘nao kơsô̆ 1 găh tơring Cư Elang păng hơnĭh oei ‘nao kơsô̆ 2 tơring Cư Bông, apŭng Ea Kar vă tơgŭm ăn tơdrong vă jang pơnơ̆t đak 4.400 ti Krông Pách thượng. Trŭh dang ei, hăm tơdrong pơrô̆ pơrôp, hơvơn đơ̆ng rim kơdră chĕp pơgơ̆r tơring hăm tơdrong ƀô̆h hơdăh dôm ŭnh hnam kon pơlei yông oei tơ̆ tơring ‘nao đei tơdrong erĭh sa sơđơ̆ng hlŏh oei tơ̆ tơring pơlei so, ŭnh hnam apĭnh năm oei tơ̆ tơring ‘nao hlôi tŏk vă jê̆ 200 ŭnh hnam.

Dơnŏ anĭh vei lăng kon pơlei apŭng Mdrăk tơbăt, apŭng tŏk bŏk hơvơn khŭl jang, jang răh tơgŭm ăn kon pơlei yông oei hơnĭh nao, adoi jang hloi pơrô̆ pơrôp kon pơlei vă pơjing đei jơhngơ̆m đon lui kiơ̆, hăm hơdrin hrôih keh đang tơdrong jang pơjing hơnĭh oei ‘nao lĕch đơ̆ng tơring dơnau đak Krông Pach thượng.

Tơblơ̆ nơ̆r: Amazưt