VOV4.Bahnar - Vă tơgŭm ‘lơ̆ng ăn pôk rơ̆ih kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026, Kŏng ty kăi ŭnh hơyŭh (PC) Dak Lăk hlôi păng tŏk bŏk tơlĕch jang rim tơdrong jang pơtrŭh ŭnh hơyŭh sơđơ̆ng, hơnơ̆ng trŭh hăm rim hơnĭh jang lơ̆m khei ‘năr pơgơ̆r pôk rơ̆ih.

Kiơ̆ đơ̆ng ƀok Trần Tấn Phụng - Kơ iĕng Kơdră chĕp pơgơ̆r Kŏng ty kmăi ŭnh hơyŭh Dak Lăk tơbăt, đơ̆ng hơdrol năr pôk rơ̆ih, Kŏng ty hlôi pơrô̆ athei rim hơnĭh jang lăng kơ jăp hơmet pơ ‘lơ̆ng tơlei ŭnh hơyŭh tơ̆ đĭ đăng hơnĭh tăh hla vă pơtrŭh ŭnh hơyŭh sơđơ̆ng ‘lơ̆ng. Kŏng ty jei hlôi tơlech jang tơdrong bơ̆ jang gĭt kăl hlŏh, hăm 100% ‘nu bơngai jang hơnơ̆ng bơ̆ jang, hơmet tôm kmăi kmŏk pơtrŭh ăn sơđơ̆ng vă hơmet pơ ‘lơ̆ng tơdăh đei tơdrong au to.

Tơblơ̆ nơ̆r: Amazưt