VOV4.Bahnar - Pơgê au, năr 4/8, dêh char Dak Lăk hlôi sơng hơvơn 59 ‘nu kon pơlei ‘nŏh bơngai jang tŏk bŏk erĭh sa tơ̆ pơlei tơm Hồ Chí Minh brŏk vĭh tơ̆ tơring păng pơm kiơ̆ oei hơdrô̆ akŏm kiơ̆ tơdrong tơchơ̆t. Đe hăp ‘nŏh dôm bơngai kŏng nhân bơ̆ jang tơ̆ Kŏng ty Worldon Việt Nam, găh Hơnĭh jang Kmăi kmŏk Đông Nam, apŭng Củ Chi, pơlei tơm Hồ Chí Minh ‘mĕh vă đei brŏk tơ̆ pơlei pơla.

Rim kŏng nhân brŏk trŭh tơ̆ Hơnĭh oei kơ Hơnĭh tơm vei lăng Sơđơ̆ng-Hnam trương Đăi hŏk Tây Nguyên

Vă pơjing rơvơn ăn kŏng nhân au đei brŏk vĭh tơ̆ pơlei pơla sơđơ̆ng, pơlei tơm Hồ Chí Minh hlôi pơrô̆ athei rim hơnĭh jang chă test rĕnh Covid-19 ăn rim kŏng nhân; Khŭl kơdră chĕp pơgơ̆r Hơnĭh jang Kmăi kmŏk Đông Nam, apŭng Củ Chi atŭm hăm Kŏng ty Worldon Việt Nam ăn 3 tong gre chơ kŏng nhân păng 1 tong gre chơ tơmam drăm brŏk pơjao ăn dêh char Dak Lăk. Mư̆h kŏng nhân brŏk trŭh tơ̆ gơng 14 tơ̆ tơring Hoà Phú, pơlei tơm Buôn Ma Thuột, khŭl kanh sát vei lăng Trong nơnăm hlôi sơng păng ba trong năm trŭh tơ̆ hơnĭh ăn oei hơdrô̆ akŏm kơ dêh char tơ̆ Hơnĭh oei kơ Hơnĭh tơm vei lăng Sơđơ̆ng-Hnam trương Đăi hŏk Tây Nguyên.

Tơblơ̆ nơ̆r: Amazưt