VOV4.Bahnar - Tơ̆ plt Buôn Ma Thuột, Anih vei lăng jang pơ gang dêh char Dak Lak sơng iŏk 5 tŏ gre ƀet bơ̆ng vaccine đơ̆ng Công ty pơ gre THACO Trường Hải tơ gŭm vă pơ yoa ăn tơ drong tang găn jĭ COVID-19 oei tơ pŏh tôch krê tơ̆ dêh char âu. 

Ƀok Nay Phi La, Kơ dră vei lăng jang pơ gang dêh char Dak Lak sơng iŏk gre

Gre đei pơm lăp hăm tơ drong ƀet bơ̆ng sơ đơ̆ng, đei yoa tơ̆ dôm tơ ring đei jĭ trong yak mơ mat tat, atŭm hăm ‘nŏh pơ yoa ăn tơ drong set hơ len jĭ COVID-19 hai. Tơ̆ gre đei kơ thŭng ‘măn vaccine păng đei kơ măy hơ len năng hơ yuh tŏ tơ ngiĕt tơ̆ anih ‘măn vaccine.

Anih vei lăng jang pơ gang dêh char Dak Lak ăn tơ băt: Lơ̆m 1.362.176 ‘nu bơ ngai kơ pal kơ 18 sơ năm, dêh char Dak Lak ‘nao ƀet vaccine tang găn jĭ COVID-19 jrŭm 1 lăp 64% păng jrŭm 2 đei 9.41%. Vă tang găn jĭ tơ pŏh, Dak Lak athei hơ tŏk hrĕnh tơ drong ƀet vaccine. Yoa thoi nŏh tơ drong tơ gŭm 5 tŏ gre ƀet vaccine âu jing tôch gĭt kăl, tơ gŭm ăn dêh char gơ̆h ƀet hrĕnh ƀiơ̆ tơ̆ dôm tơ ring hơ tăih yăih păng dôm tơ ring kon pơ lei oei xa hơ tăih kơ hnam pơ gang.

Dơ̆ng: Tơ blơ̆