VOV4.Bahnar - Kơ ‘năr dơ̆ng ‘năr 31-5 Anih tơm vei lăng găh tơ drong jang pơ gang tơ băt hơ dăh dơ̆ng 1 ‘nu jĭ COVID-19 tơ̆ Dak Lak, ‘noh jĭ bơ ngai jĭ kơ sô̆ 7186. Bơ ngai âu oei tơ̆ thôn 7, xăh Cư Mốt, apŭng Ea H’Leo, jĭ F1 đơ̆ng bơ ngai jĭ tơ̆ pơ lei tơm Hồ Chí Minh. Tơ̆ hơ năp đei ƀôh krê hơ mơt đơ̆ng jĭ hơ buh, apŭng Ea H’Leo hlôi hăt hot tơ lĕch jang lơ trong jang chĕng gơ var tơ ring tang găn jĭ. Đơ̆ng rŏng 1 năr, hloh 600 ‘nu F1, F2 păng F3 hlôi đei tơ chă, 10 hơ nih tŏk bŏk pơm kiơ̆ pơ vang găn. Tơ drong ư̆h kơ ăn yak vih vơ̆t mơ̆t lĕch lơ̆m tơ pôl kŭm hlôi đei tơ lĕch jang tơ tĕnh.

Ƀok Nông Ngọc Thiết, Kơ dră Anih vei lăng kon pơ lei xăh Ea Wy, tơ ring đei dôm hơ nih ƀơm truh bơ ngai jĭ kơ sô̆ 7186, tơ băt, iŏk đơ̆ng 10 jơ gơ măng  ‘năr 30-5, khŭl linh kơ pal tơ ring hlôi jang kiơ̆ pơm hơ nih răp găn, pơ vang găn rim hơ nih tĕch mơ dro sa Thanh Dậu, hơ nih tĕch mơ dro huch cheh phe cây Si, hơ nih tĕch mơ dro tơ mam sa 3 Khía, hơ nih khăm Nha khoa Việt Pháp 2, hơ dai hăm ‘noh jang kiơ̆ tơ chă dôm f1 f2:

 “Hăm rim trong jang ‘noh hlôi chih jô̆ đei 27 ‘nu F1, dôm bơ ngai F2 kŭm vă jê̆ 200 ‘nu. Nhôn hlôi bơ̆ jang kiơ̆ 5 hơ nih răp găn tơ̆ rim tơ ring đei bơ ngai F0 năm brih. Dôm hơ nih răp găn kŭm hlôi đei tơ roi lơ̆m aloa radio. Nhôn tơ lĕch jang ăn Hnam pơ gang xăh hơ nơ̆ng tơ chă dôm bơ ngai F1, F2 păng F3. Găh tơ drong ‘nâu nhôn krao hơ vơn kon pơ lei băt hơ dăh rim tơ drong kơ tơ̆ng ang hơ nơ̆ng năm tơ roi tơ băt y tế.”

Hơ nih pơ vang găn thôn 6b xăh Cư Mốt

Oei tơ̆ xăh Cư Mốt, tơ ring đei bơ ngai jĭ COVID-19 kơ sô̆ 7186, đơ̆ng gơ măng ‘năr 30/5 truh dang ei khŭl kơ dră xăh hlôi tơ chă păng ăn năm oei hơ drô̆ akŏm 15 ‘nu F1. 150 ‘nu F2 păng 180 ‘nu F3 kŭm hlôi đei pơ tho ăn oei hơ drô̆ y tế. Tơ ring kŭm pơ jing 5 hơ nih răp pơ vang găn tơ̆ 3 thôn 6a, 6b păng thôn 7 hăm 2.500 kon pơ lei. Ƀok Võ Văn Lệ, Phŏ kơ dră Anih vei lăng xăh Cư Mốt, tơ băt: rim hơ nih răp găn, khŭl kơ dră xăh ăn hơ met ăn 7 ‘nu jang ‘noh đei khŭl linh kon pơ lei, khŭl hơ druh tơ dăm, Khŭl vei lăng drŏ kăn păng Kŏng an vei lăng. Tơ drong jang tơ gŭm ăn kon pơ lei lơ̆m hơ nih pơ vang găn kŭm đei tơ ring lăng truh:

 “Nhôn pơ jao 1 grŭp 2 ‘nu tơ dăm păng drŏ kăn mư̆h kon pơ lei lơ̆m hơ nih pơ vang găn đei ‘mĕh vă ‘noh gô pơ ma dơ nuh ‘noh khŭl hơ druh tơ dăm năm jang tơ gŭm đơ̆ng nhôn gô năm răt dôm tơ mam kăl đơ̆ng kon pơ lei vă pơ truh ăn kon pơ lei. Anih jang mặt trận kŭm tơ lĕch nơ̆r krao hơ vơn  vă athei kang ƀô̆ kŭm nhen bơ ngai jang teh đak lơ̆m tơ ring đei vang tơ gop đơ̆ng kơ dih ăn tơ drong jang tang găn jĭ âu”.

Kiơ̆ kơ ƀok Nguyễn Văn Hà, Kơ dră Anih vei lăng kon pơ lei apŭng Ea H’Leo, jô̆ truh 2 jơ kơ sơ̆ ‘năr 31-5, tơ ring âu hlôi tơ chă đei 62 ‘nu F1, hloh 300 ‘nu F2. Dang ei pơ đĭ bơ ngai F1 hlôi đei ăn năm tơ̆ hơ nih oei hơ drô̆ akŏm kơ dêh char tơ̆ hơ nih Ký túc xá  hnam trưng Cao đẳng Công nghệ Tây Nguyên. Pơ tôch hơ len ăn hlôi đei 47/62 ‘nu ư̆h kơ đei ƀôh pơ rang jĭ ‘măng mă 1 hăm SARS –CoV2. Đơ̆ng 9 jơ gơ măng ‘năr 31-5 Anih vei lăng kon pơ lei apŭng kŭm hlôi jang kiơ̆ ư̆h kơ ăn yak vih vơ̆t lơ̆m tơ pôl kiơ̆ tơ drong tơ chơ̆t 15 đơ̆ng Thủ tướng teh đak hăm thị trấn Ea Đrăng, xăh Ea Wy.

Pơ vang găn hơ nih tĕch tơ mam Ba Khía xăh Ea Wy

Ƀok Nguyễn Văn Hà pơ ma hơ dăh, khŭl kơ dră tơ ring hlôi tơ lĕch trong jang vei sơ đơ̆ng tơ mam sa pơ yua ăn tơ drong arih sa ăn kon pơ lei. Kŭm hăm ‘noh, Anih vei lăng kon pơ lei apŭng hlôi klăih song tơ drong jang ăn kơ rim anih jang păng athei rim khŭl jang kơ pal athei phak kơ hret dôm bơ ngai pơm glăi tơ drong hơ găt ư̆h kơ ăn yak vih vơ̆t:

 “Joh ayŏ đei hơ năp jang athei hơ len lăng dôm tơ drong jang joh ayŏ vei lăng, Nội vụ ‘noh hơ len lăng găh tơ drong lui khop oei kŏng an ‘noh hơ len lăng rim hnam gre chơ tơ moi brŏk năm. Hăm rim xăh, rim anih jang tơ dăh nhen lê̆ đei ƀôh tơ drong pơm glăi ‘noh hơ năp jang ‘noh tơ̆ găh bơ ngai chĕp kơ̆l. Ưh kơ pơm pơ hơi mă lei ling lang đei jơ hngơ̆m đon kơ chăng.”

‘Măng đei ƀôh jĭ COVID-19 mă 4 ‘nâu, Dak Lak hlôi đei 4 ‘nu jĭ ‘noh jĭ dôm bơ ngai jĭ kơ sô̆ 3237, 3334, 3836 păng 7186. Tơ ring ‘nâu kŭm hlôi ăn oei hơ drô̆ akŏm, ăn oei hơ drô̆ y tế kơ hrĕng ‘nu F1, ăn oei hơ drô̆ tơ̆ hnam hloh 5 rơ bâu ‘nu păng hloh 3 rơ bâu ‘nu arih lơ̆m hơ nih pơ vang găn.

            Nam Trang: Chih

Thuem: Tơ blơ̆