VOV4.Bahnar - Tơ̆ pơ lei tơm Buôn Ma Thuột, dêh char Dak Lak dang ei đei 1 anih jang kơ măy kơ mŏk păng 2 anih akŏm jang kơ măy kơ mŏk hăm dang 4.000 ‘nu bơ ngai jang tŏk bŏk bơ̆ jang. Tơ̆ hơ năp đei ƀôh  krê hơ mơt đơ̆ng jĭ hơ buh Covid – 19, rim kŏng ti, hnam kơ măy dăh mă anih jang hlôi tŏk bŏk tơ lĕch lơ trong jang tang găn jĭ kiơ̆ athei đơ̆ng Trung ương kŭm nhen tơ ring vă vei sơ đơ̆ng ăn bơ ngai jang kŭm nhen bơ̆ jang pơm tơ lĕch tĕch mơ dro.

         Kŏng ti jang pơ sey Đông Nam Á tơ̆ Anih jang kơ măy kơ mŏk Hòa Phú, pơ lei tơm Buôn Ma Thuột, dêh char Dak Lak đei hloh 600 ‘nu kang ƀô̆, bơ ngai jang tŏk bŏk bơ̆ jang. Yă Lê Thị Tuyết Hạ - Phŏ kơ dră dơ nơm vei lăng kŏng ti vang tơ gŭm, pơm tơ lĕch tĕch mơ dro đơ̆ng anih jang mơ dro sa tơ klep hăm vei sơ đơ̆ng tang găn jĭ, athei pơm kiơ̆ tơ chơ̆t 5K găh jang pơ gang đei vei kơ jăp păng jang kiơ̆ tơ păt truh rim grŭp, khŭl pơm tơ lĕch.

 “Blŭng a ‘noh pơm kiơ̆ tơ drong hơ găt “5K” đơ̆ng Anih tơm vei lăng găh jang pơ gang. Hơ dai hăm ‘noh kŏng ti kŭm athei đĭ đăng rim ‘nu mơ̆t lĕch lơ̆m kŏng ti athei tơ roi tơ băt y tế, năm klĕch hơ nih prŭih pơ gang; hơ met ăn 1 grŭp vă pơ ma dơ nuh hăm tơ moi păng sơng iŏk hla ar  vă veh ver dôm bơ ngai đơ̆ng hơ nih hơ tăih tơ ƀơ̆p pơ ma dơ nuh hăm bơ ngai lơ̆m kŏng ti. ‘Ngoăih kơ ‘noh, nhôn oei pơm kiơ̆ ngôi hơ tăih băl, klăih song bơ ngai jang tơ̆ khŭl jang hành chính;hnam sŏng sa tơ pôl ‘noh pơm tơ năr găn... vă vei sơ đơ̆ng tang găn jĭ đei yua păng vei sơ đơ̆ng tơ drong jang pơm tơ lĕch.”

Hơ nih ăn oei hơ drô̆ hiă kơ Anih jang mơ dro sa tơ̆ hơ nihakŏm jang kơ măy kơ mŏk Tân An 1

Oei kŏng ti Xuân Hòa joăt pơm tơ lĕch tơ mam kơ măy kơ mŏk tơ̆ Hơ nih jang kơ măy kơ mŏk Tân An 1, phường Tân Lợi, pơ lei tơm Buôn Ma Thuột dang ei đei vă jê̆ 100 ‘nu bơ ngai jang. Jang kiơ̆ tang găn jĭ hơ băt kơ hret, kŏng ti hlôi pơm hơ nih pruih pơ gang tơ̆ ‘măng mơ̆t lĕch; hơ met ăn bơ ngai jang tơ plih băl jang kiơ̆ pơ tŏ hyuh hơ kâu, athei rim bơ ngai mơ̆t lĕch lơ̆m kŏng ti ôp ti hăm đak pơ gang, pơ tho tơ roi tơ băt y tế, chă asong păng thei gom muh măt; pơm hơ nih ăn oei hơ drô̆ hiă păng hơ nơ̆ng pruih pơ gang pơ đĭ anih jang. Yă Trần Thị Thanh Hoa – Kơ dră khŭl vei lăng bơ ngai jang Kŏng ti Xuân Hòa tơ băt, rim ‘nu bơ ngai jang kơ anih jang mơ dro sa kŭm hlôi đei pơm kiơ̆ tôm dôm tơ drong pơ kăp tang găn jĭ mư̆h brŏk hăm ŭnh hnam păng oei sa tơ̆ tơ ring.

          “Nhôn athei đĭ đăng kŏng nhân lơ̆m kŏng ti mư̆h đĭ jơ ‘noh athei brŏk tơ păt tơ̆ hnam, ‘nĕ ngôi tơ jê̆ lơ bơ ngai lơ̆m khei ‘năr âu, lapw lĕch tơ̆ ngoăih mư̆h đei tơ drong kăl vă vei sơ đơ̆ng jơ hngơ̆m jăn, pơ vei ‘lơ̆ng bơ ngai jang.”

         Tơ̆ pơ lei tơm Buôn Ma Thuột, dêh char Dak Lak dang ei đei 106 anih jang mơ dro sa bơ̆ jang tơ̆ 2 hơ nih jang kơ măy kơ mŏk atŭm, hăm dang 4.000 ‘nu bơ̆ jang.

Rim bơ ngai mơ̆t lĕch lơ̆m rim hơ nih jang kơ măy kơ mŏk tơ̆ pơ lei tơm Buôn Ma Thuột adoi pơm kiơ̆ tơ drong pơ lôch pơ rang tơ̆ hơ hih prŭih pơ gang

         Kiơ̆ kơ ƀok Đoàn Ngọc Thượng – Phŏ kơ dră anih vei lăng kon pơ lei pơ lei tơm Buôn Ma Thuột, tơ̆ hơ năp đei ƀôh mơ mat tat ư̆h kơ tom băt đơ̆ng jĭ Covid – 19, mă loi ‘nŏh jĭ hlôi tơ drŭt lơ̆m 1,2 hơ nih jang kơ măy kơ mŏk tơ̆ lơ tơ ring lơ̆m teh đak, pơm pơ răm tôch kơ tih, Anih vei lăng kon pơ lei pơ lei tơm hlôi athei rim anih jang mơ dro sa lơ̆m tơ ring hơ tŏk tơ iung jang tang găn jĭ mă kơ tang. Pơ jing khŭl dăr hơ len pơ đĭ rim anih jang mơ dro sa, tơ dăh chă ƀôh anih jang hơ yơ pơm glăi tơ drong jang tang găn jĭ gô sek phak tơ păt. Đơ̆ng noh, kơ chăng tơ jră hăm jơ hngơ̆m đon hơ drin kơ tang hloh vei sơ đơ̆ng jang kiơ̆ tơ drong hơ găt hơ dai hơ tŏk tơ iung mŭk drăm tơ pôl hai tang găn jĭ đei yua hai.

          “Vă jang kiơ̆ ‘lơ̆ng tơ drong jang tang găn jĭ Covid – 19 đei yua tơ̆ hơ năp kơnh tơ̆ rim hơ nih jang kơ măy kơ mŏk ‘noh mă hơ drol athei pơm kiơ̆ ‘lơ̆ng tơ drong jang tơ roi tơ băt vă kơ rim anih jang mơ dro sa pơm kiơ̆ tôm rim trong jang tang găn jĭ kiơ̆ nơ̆r pơ tho đơ̆ng Anih tơm vei lăng găh jang pơ gang. Vei lăng ‘lơ̆ng kơ sô̆ kŏng nhân tŏk bŏk bơ̆ jang lơ̆m rim kŏng ti. Anih vei lăng kon pơ lei pơ lei tơm kŭm gô dar deh athei rim hnam kơ măy hơ met ăn hơ nih oei sa, ƀĭch pơ dơh, bơ̆ jang kơ tă anih ăn bơ ngai jang mư̆h đei tôm tơ drong hiôk; hơ nơ̆ng hơ len lăng rim gre chơ, mă loi ‘noh jĭ dôm bơ ngai huơ̆r gre brŏk đơ̆ng tơ̆ rim tơ ring jĭ pơm kiơ̆ tơ drong chơ tơ mam tơ̆ anih jang mơ dro sa.”

‘Măng đei ƀôh jĭ COVID -19 ‘măng mă 4 âu, Dak Lak hlôi đei 5 ‘nu tơ poh jĭ SARS –CoV – 2, lơ̆m noh đei 4 ‘nu đĭ klăih kơ jĭ păng đei lĕch brŏk đơ̆ng hnam pơ gang bơ̆ih. Tơ ring kŭm hlôi ăn oei hơ drô̆ akŏm, oei hơ drô̆  y tế hloh 200 ‘nu F1, ăn oei hơ drô̆ tơ̆ hnam hloh 20.500. Vă tang găn tŏ sĕt hloh hơ met kơ jĭ COVID -19 tơ poh lanh ăn tơ pôl, đơ̆ng gơ măng brei truh dang ei, rim anih jang kơ pal hlôi akŏm đĭ bơ ngai jang vă tơ chă, gơ var tơ ring păng hơ len lăng dôm bơ ngai ƀơm truh. Tơ drong vei sơ đơ̆ng tơ drong arih sa ăn dôm  ŭnh hnam kon pơ lei đei pơ vang găn kŭm đei jang kiơ̆ tơ năp.

            Tuấn Long: Chih

Thuem: Tơ blơ̆