VOV4.Bahnar - Vă tơ tom pơ lung sinh viên bơ ngai kon kông đei hŏk hơ gei lơ̆m hŏk pơ hrăm, kơ sơ̆ ‘năr 12/11, Khŭl vei lăng hơ druh tơ dăm Việt Nam dêh char Dak Lak jang hơ dai hăm Khŭl vei lăng Sinh viên Việt Nam dêh char pơ gơ̆r tơ drong jang tơ ƀơ̆p muh măt, pôk pơ ư sinh viên bơ ngai kon kông hơ gei ‘măng mă 23, sơ năm 2021. Yua kơ ƀơm ưh kơ ‘lơ̆ng đơ̆ng jĭ Covid-19 kơ na tơ drong jang đei pơ gơ̆r trực tuyến hăm 15 hơ nih pơih ti vi tơ̆ dôm apŭng, thị xăh păng pơ lei tơm lơ̆m dêh char. Dêh char Dak Lak dang ei đei dang 9.800 ‘nu sinh viên tŏk bŏk kiơ̆ hŏk tơ̆ rim hnam trưng kao đăng, đăi hŏk lơ̆m teh đak; lơ̆m noh đei hloh 2.000 ‘nu sinh viên bơ ngai kon kông.

65 ‘nu sinh viên bơ ngai kon kông dêh char Dak lak hŏk hơ gei sơ năm hŏk 2020 – 2021 đei pôk pơ ư

Lơ̆m kơ sô̆ âu đei lơ bơ ngai hơ gei hlôi iŏk đei jơ nei lơ̆m hŏk pơ hrăm ‘lơ̆ng, hơ drin vang jang rim tơ drong jang hue lăng găh tơ pôl. Tơ̆ tơ drong jang, rim sinh viên hlôi pơ ma dơ nuh, tơ roi băl găh tơ drong hŏk pơ hrăm, hơ drin yak hloh mơ mat tat păng hơ met ‘lơ̆ng jơ năr vă vang jang rim tơ drong jang tơ gŭm. Lơ̆m ‘măng âu, anih pơ gơ̆r kŭm pôk pơ ư 65 ‘nu sinh viên bơ ngai kon kông dêh char Dak Lak hŏk hơ gei sơ năm hŏk 2020 – 2021.

Thuem: Tơ blơ̆