VOV4.Bahnar - Mă đơ̆ng Dơnŏ anĭh vei lăng kon pơlei dêh char Dak Lăk hlôi tơchơ̆t pơđunh jơ ‘năr hŏk trŭh năr 15/9, mă lei hrei au, Dak Lăk oei tơ ƀơ̆p tơnap tap găh tơdrong tĕch mơdro kơsơ̆p hla bơar hŏk ăn hŏk tro. Kơ yuơ kơsơ̆p hla bơar ‘nŏh ư̆h kơ lơ̆m hơnăn tơmam drăm yua kăl kơna đơ̆ng năr 26/8 trŭh dang ei, rim hnam tĕch mơdro kơsơ̆p hla bơar tơ̆ rim tơring tŏk bŏk pơm kiơ̆ Nơ̆r athei jang kiơ̆ 16 kơna măh tang ‘măng tơplĭh tĕch mơdro kiơ̆ trư̆k tuyên. Kiơ̆ đơ̆ng ƀok Trương Văn Băng, Kơdră chĕp pơgơ̆r Kŏng ty tơmam drăm hŏk pơhrăm Dak Lăk tơbăt, rim sơnăm hơdrol Kŏng ty hlôi tĕch mơdro kơsơ̆p hla bơar hŏk, hla bơar chĭh, tơmam drăm pơ yoa ăn hŏk pơhrăm ‘moi kiơ̆ 7 hnam tĕch mơdro kơsơ̆p hla bơar păng 400 hơnĭh sơdrai lơ̆m dêh char. Sơnăm au kơ yuơ tơdrong jĭ hơbŭh Covid-19 pơrăm kơtang kơna tơdrong chă pơtrŭh ăn, chơ pơdŭ, tĕch mơdro kơsơ̆p hla bơar ăn hŏk tro tơ ƀơ̆p tôch tơnap tap. Đơ̆ng năr 5/9, kŏng ty jang kiơ̆ tĕch mơdro online sơng iŏk nơ̆r apĭnh răt đơ̆ng bơngai răt ‘moi kiơ̆ Zalo, Facebook. Kơ yuơ sơnăm blŭng a tơlĕch tĕch mơdro kiơ̆ online kơna kŏng ty tơ ƀơ̆p tôch tơnap tap lơ̆m tĕch mơdrop kơsơ̆p hla bơar ăn bơngai răt. Jĭ hơbŭh Covid-19 tơ̆ Dak Lăk rŏ năng oei hơnơ̆ng kơtang lơ̆m khei năr kơnh. Kơ yuơ lơ lŏh, tơdăh Dơnŏ anĭh vei lăng kon pơlei dêh charư̆h kơ đei trong hơmet pơ ‘lơ̆ng tơtom lei tơdrong hŏk tro ư̆h kơ măh kơsơ̆p hla bơar hŏk pơhrăm lơ̆m sơnăm au oei hơnơ̆ng đĕch.

Tơblơ̆ nơ̆r: Amazưt