VOV4.Bahnar - Tơ̆ dêh char Dak Lak, tơ drong arih sa hmă hlôi ƀrư̆ ƀrư̆ hơ lơ̆k dơ̆ng hăm dôm tơ ring jĭ hơbuh ƀơ̆t dôm bơ ngai jĭ Covid-19 đei vei lăng, jĭ hơ buh đei tang găn kĕ ‘lơ̆ng. Lơ bơ ngai jĭ đơ̆ng rŏng kơ khei ‘năr hơ met jĭ hlôi vih lơ̆m tơ drong ‘mêm kơ eng đơ̆ng bơ ngai lơ̆m hnam păng tơ pôl. Jĭ hơ buh hlôi tơ gŭm ăn rim bơ ngai tơ jê̆ dơ̆ng hloh păng gĭt ‘mêm kơ dôm khei ‘năr sơ đơ̆ng hơ dai băl.

Đơ̆ng rŏng vă jê̆ 1 khei pơ đĭ ŭnh hnam athei pơm kiơ̆ ăn oei hơ drô̆ hơ met akŏm yua kơ jĭ Covid-19, ‘nhŏng Đỗ Văn Lực oei tơ̆ plei Cuôr Đăng A, xăh Cuôr Đăng, apŭng Cư M’gar tôch kơ chhôk yua kơ ŭnh hnam hlôi sơ đơ̆ng oei hơ dai băl. ‘Nhŏng Lực tơ roi: Lơ̆m ‘măng jĭ hơ buh đei ƀôh tơ̆ xăh ƀơ̆t blŭng khei 11, ŭnh hnam sư 5 ‘nu ‘noh đei 4 ‘nu tơ poh jĭ Covid-19. Lơ̆m noh, pơ đĭ 2 ‘nu klo kăn tă kơ athei ăn oei hơ drô̆ hơ met jĭ pơm ăn tơ drong arih sa tơ sŭl tơ săl. Bơ ngơ̆t hloh ‘noh jĭ 2 ‘nu kon ‘lơ̆p tŏk bŏk sơ năm hŏk kŭm đei jĭ. Tơ drong bơ ngơ̆t yua kơ jĭ lơ dôm yơ ‘noh ƀôh pŭn ai klăih kơ jĭ, bơ ngai lơ̆m ŭnh hnam kŭm lơ thoi noh:

“Ƀơ̆t blŭng ‘noh tôch kơ hli bơ ngơ̆t, yua kơ bu kŭm tă kơ jĭ ngăl kơ na dai hli. Đơ̆ng rŏng ‘noh ƀak si vei lăng pơ lung athei chơ̆n jơ hngơ̆m, pơ tâp hơ kâu jăn, sŏng sa ‘lơ̆ng, jơ hngơ̆m pran ‘lơ̆ng ‘noh gô yak hloh. Ŭnh hnam nhôn pŭn ai ƀơ̆t đei tơ drong arih sa hmă dơ̆ng.”

Kon pơ lei hlôi arih sa hmă hơ lơ̆k dơ̆ng

Kŭm hlôi jing 1 lơ̆m dôm hơ nih đei jĭ tơ̆ Dak Lak, dang ei tơ drong arih sa kơ kon pơ lei xăh Cư Pui apŭng Krông Bông hlôi jing hmă hơ lơ̆k dơ̆ng. Ƀok Y Bran Niê, oei tơ̆ plei Khoá, xăh Cư Pui, tôch kơ chhôk hơ iă ƀơ̆t ŭnh hnam đei 6/9 ‘nu ‘noh F0, adoi đei hơ met klăih. Ƀok Y Bran tơ băt: Hơ dai hăm tơ drong tơ tăm kơ jơ hngơ̆m pran păng hơ kâu jăn, ƀơ̆t pơ đĭ ŭnh hnam năm ăn oei hơ drô̆ hơ met jĭ oei hơ nhăk ba tơ drong tơ tăm bơ ngơ̆t kơ pơ yan jang, yua kơ cheh phe đĭ truh năr phĕ; kơ pô rơ mo kăl kơ đei bơ ngai vei. Kŭm gơ nang kơ khŭl kơ dră tơ gŭm, mih ma duch nă krao điên thoăi pơ lung apĭnh get gia, đe ƀak si tơ năp hơ met kơ na rim bơ ngai hlôi pran jăng ƀrŏk tơ̆ hnam sơ đơ̆ng. ‘Long pơ tăm, kon tơ rong kŭm đei tơ gŭm vei lăng pơ ‘lơ̆ng:

“Ŭnh hnam đei F0 kŭm dai hli bơ ngơ̆t ƀơ̆t 1 ‘nu 1 hơ nih pơ ma dơ nuh ưh kơ gơh. Ĭnh năm tơ̆ ‘noh ƀôh đei vei lăng tôm, por sŏng tôm. Ĭnh ƀrŏk truh tơ̆ âu tơ ƀơ̆p dơ̆ng ŭnh hnam chhôk dêh. Ĭnh ưh kơ tơ tăm kiơ dơ̆ng ôh, yua kơ rim bơ ngai klăih đĭ bơ̆ih, liĕm kâu dơ̆ng păng năm jang đĭ dơ̆ng bơih.”

Kon pơ lei tơ ring jĭ hlôi arih sa hmă hơ lơ̆k dơ̆ng

 Apŭng Krông Bông mĭnh lơ̆m dôm tơ ring đei lơ bơ ngai jĭ Covid-19 lơ̆m tơ pôl. Mă lei, truh dang ei lơ bơ ngai đĭ klăih bơ̆ih, ƀrŏk tơ̆ ŭnh hnam hơ nơ̆ng jang sa. Ƀok Nguyễn Ngọc Pháp, Phŏ Kơ dră Anih vei lăng Kon pơ lei apŭng Krông Bông tơ băt: Tơ̆ rim pơ lei pơ la hơ drol âu ki ‘noh đei jĭ dang ei ưh pă đei bơ ngai jĭ lơ̆m tơ pôl. Apŭng hlôi tơ ring jơk dơ̆ng bơ̆ih, mă lei jơ hngơ̆m đon kơ chăng, băt tang găn jĭ oei hơ nơ̆ng đei hơ tŏk ‘lơ̆ng.

“Anih pơ gơ̆r jang kơ apŭng kŭm hlôi hơ drin pơ gơ̆r jang akŏm gơ var găn, pruih pơ gang, hơ len lăng tơ chă dôm F1, F2 păng tơ tom ăn năm oei hơ drô̆. Oei hăm tơ ring pơ gang văn hlôi dăr hơ len kơ hret yua thoi noh Krông Bông tơ tĕnh tang găn đei jĭ”.

Dôm kơ suơ̆t por sŏng asong hăm bơ ngai vih đơ̆ng ăn oei hơ drô̆ tang găn jĭ Covid-19

Kiơ̆ chih jô̆ đơ̆ng anih jang pơ gang Dak Lak jô̆ truh ‘năr 16/12, lơ̆m dêh char hlôi đei hloh 9.700 ‘nu jĭ Covid-19, lơ̆m noh hloh 7 rơ nâu hlôi hơ met klăih. Dêh char lui akhan Covid-19 tŏk bŏk ƀrư̆ ƀrư̆ đei vei lăng, păng hlôi ăn pơ dơh bơ̆ jang 1 hnam pơ gang pơm pơ gia. Lơ tơ ring lơ̆m dêh char, jô̆ hloi dôm tơ ring mă hlôi đei jĭ lơ, kon pơ lei tŏk bŏk pơm lăp ‘lơ̆ng păng iŏk đei tơ drong arih sa hmă ‘nao.

Tuấn Anh: Chih

Thuem: Tơ blơ̆