VOV4.Bahnar - Vă pơ lung jơ hngơ̆m đe hơ ioh tŏk bŏk hơ met jĭ păng pơm kiơ̆ ăn oei hơ drô̆ y tế vă tang găn jĭ Covid-19, ‘năr brei (17-9), Jơ nŭm khŭl dêh char Dak Lak păng Hnam jŏh ayŏ hơ ioh dêh char jang hơ dai hăm anih jang tơ gŭm pơ gơ̆r tơ drong jang “ Hơ drŭng unh kơ đeng tơ̆k hơ dăh tơ drong hơ pơi ‘meh” Trung thu 2021.

Kiơ̆ kơ ‘noh, khŭl hlôi năm tơ mang păng pơ jao asong 200 tơ pu tơ mam trung thu ăn kơ đe oh iĕ tơ̆ 4 hơ nih ‘noh đei; Hnam pơ gang pơm pơ gia kơ sô̆ 1 păng Hơ nih ăn oei hơ drô̆ akŏm Hnam trưng Cao đẳng Công nghệ Tây Nguyên tơ̆ pơ lei tơm Buôn Ma Thuột; Hơ nih ăn oei hơ drô̆ akŏm păng plei Pưk Prong tơ̆ xăh Ea Ning, apŭng Cư Kuin; păng hơ nih pơ vang găn tơ̆ xăh Cư Né, apŭng Krông Búk. Mĭnh tơ pu tơ mam ‘noh đei ƀĕng trung thu, đak toh, unh kơ đeng hơ drŭng vă kơ đe oh đei sơng Tết Trung thu tôm. Akŏp jên bơ̆ jang tơ drong jang ‘noh 30 triệu hlak jên.

Thuem: Tơ blơ̆