VOV4.Bahnar - Vă tơ gŭm kon pơ lei đơ̆ng pơ lei tơm Hồ Chí Minh đei dêh char Dak Lak sơng brŏk lơ̆m gơ măng ‘năr 10/8, Khŭl hơ druh tơ dăm grŭp rim anih jang păng anih mơ dro sa dêh char Dak Lak pơ gơ̆r tơ drong jang “ Hơ nih pai gĭ gơ măng hơ druh tơ dăm” vă pai 500 kơ suơ̆t sŏng sa pơ vih pơ văn đĕch ăn kon pơ lei brŏk đơ̆ng tơ ring jĭ. 1 kơ suơ̆t sŏng sa ‘noh đei chao jơ̆ng nhŭng, đak toh hơ ƀo păng đak nhă tăh lơ̆m get chai.

Dôm đoan viên hơ druh tơ dăm vang pai gŏ

Dôm kơ suơ̆t chao đei tăh lơ̆m kơ hôp, pơm tơ tŏ lơ̆m kơ thŭng sôp păng hơ nhăk ba tơ̆ hơ nih akŏm tơ̆ Hnam trưng hŏk jăl 3 teh đak rong ‘me hŏk tro kon kông Nơ Trang Lơng dêh char Dak Lak. Gơ măng hei, 345 ‘nu đei sơng brŏk ‘noh dôm bơ ngai tơ gŭm hơ drol ‘noh jĭ: Bơ ngai kră, hơ ioh, drŏ kăn oei hơ năp, drŏ kăn tŏk bŏk rong kon ‘lơ̆p hơ la 36 khei; bơ ngai năm khăm hơ met jĭ, năm ngôi tơ̆ ‘nhŏng ŏh, bơ̆ jang tam mă gơ̆h brŏk; bơ ngai tŏk bŏk sa jên tơ gŭm tơ pôl rim khei; bơ ngai lơ̆m ŭnh hnam năm hơ dai hăm hơ ioh hơ la kơ 10 sơ năm, bơ ngai jĭ  .... đei ‘mĕh vă brŏk tơ̆ anih oei sa. Kon pơ lei đơ̆ng rŏng kơ  test tơ dăh ư̆h kơ ƀô̆h pơ rang jĭ gô ăn brŏk ăn oei hơ drô̆ akŏm tơ̆ tơ ring 14 năr păng hơ nơ̆ng hơ len lăng jơ hngơ̆m jăn tơ̆ hnam  7 năr. Mưh bơ ngai đei ƀôh jĭ gô ăn brŏk tơ̆ hơ nih hơ met jĭ kơ dêh char.

Lơ̆m ‘năr 10/8 mơ̆n, tơ drong jang tơ gŭm “Gre chơ ‘mêm mơ nat” hlôi chơ ba lơ tơ mam tơ gŭm ăn kon pơ lei tơ̆ tơ ring đei pơ vang găn tơ̆ xăh sơ lam Ia Rvê, apŭng Ea Súp, dêh char Dak Lak. Tơ drong jang âu yoa Khul drŏ kăn ƀô đô̆i vei lăng tơ ring sơ lam dêh char jang hơ doi hăm khul jang tơ gŭm Thiện Tâm 47 păng dôm anih jang vang tơ gŭm.

Gơih tơ mam ăn kon pơ lei ƀât anih gak hơ len jĭ

Tơ̆ xăh Ia Rvê, khul gơih tơ gŭm 30 tơ pu tơ mam ăn dôm unh hnam mơ mat tat tơ̆ thôn 8 oei bơ̆ jang kiơ̆ tơ drong pơ vang găn tơ̆ hnam. 1 tơ pu tơ mam đei: 5 kĭ phe, 1 kơ thŭng mi tôm, đak kho, đak măm, ƀôt ngok, ƀĕng mi, chả giò păng 100 rơ bâu jên măt. Dôm tơ pu tơ mam đei Khul tang măt kơ pơ lei iŏk păng pơ jao ăn rim unh hnam. Kŭm hăm ‘nŏh, khul oei tơ gŭm 500 kĭ ‘nhot, ƀum, plei ‘long ăn kon pơ lei; hơ păh 500 kơ chai đak nhă păng 100 kơ mĭl găn đak hai tơ prăh ăn đi linh oei bơ̆ jang tơ̆ dôm anih gak.

Thuem hăm Dơ̆ng: Tơ blơ̆