VOV4.Bahnar - Vă tŭn pran rim tơ drong jang năm chă tơ gŭm yua kơ tơ pôl yak truh hơ druh tơ dăm hơ ioh păng kon pơ lei đei tơ drong arih sa mơ mat tat lơ̆m dêh char, sơ năm mơ lôh Dak Lak tơ lĕch jang tơ drong jang Năm chă tơ gŭm pơ yan tơ ngiĕt hăm lơ tơ drong jang ‘lơ̆ng hơ iă. Kiơ̆ kơ ‘noh, rim kơ dră khŭl lơ̆m dêh char tơ lĕch jang tŭn pran tơ roi tơ băt tang găn jĭ Covid-19 ăn kon pơ lei; krao hơ vơn kon jên vă asong kơ hrĕng tơ pu tơ mam păng ao tơ nŏ, khăn tơ nŏ ăn hŏk tro dơ nuh hin, pơ jao dôm kơ suơ̆t jên tơ iung tơ drong jang sa ăn hơ druh tơ dăm, tơ gŭm hơ druh tơ dăm đơ̆ng kơ chu jing oei arih sa ‘lơ̆ng hơ dai dơ̆ng hăm tơ pôl.

Dôm tơ pu tơ mam ‘măn asong ăn kon pơ lei mơ mat tat đei bơm ưh kơ ‘lơ̆ng yua đơ̆ng jĭ Covid-19

Anih jang Đoan dêh char Dak Lak rơ̆ih xăh Ea Riêng, apŭng Mdrăk vă pơ gơ̆r tơ drong jang kơ dêh char păng pơ jao asong 50 tơ pu tơ mam ăn rim ŭnh hnam đei tơ drong arih sa mơ mat tat, 10 tong gre tang vang kŭm hăm khăn tơ nŏ păng ao tơ nŏ ăn kơ đe oh hŏk tro... Lơ̆m tơ drong jang, Anih jang Đoan dêh char Dak lak kŭm hlôi tơ lĕch jang ming man 2 tŏ hnam ‘mêm mơ nat ăn kơ ŭnh hnam đoàn viên hơ druh tơ dăm mơ mat tat găh hnam oei tơ̆ apŭng Krông Pắch păng Ea Kar. Akŏp  jên bơ̆ jang kiơ̆ tơ drong jang kơ dêh char ‘noh hloh 200 triệu hlak jên.

Thuem: Tơ blơ̆