VOV4.Bahnar - ‘Năr 16/8, Kŏng an apŭng Krông Pach, dêh char dak Lak hlôi tơ lĕch tơ drong tơ chơ̆t tơ kêng yoch “ Pơm tơ poh lanh jĭ hơ buh krê hơ mơt ăn bơ ngai” đei ƀôh khei ‘năr 8/2021 tơ̆ thôn 6 păng thôn 7 xăh Vụ Bổn, hlôi đei ƀôh 2 hơ nih jĭ Covid-19 hăm hloh 20 ‘nu. Lăp đơ̆ng rŏng kơ chă ƀôh dôm hơ nih đei jĭ, khŭl kơ dră apŭng Krông Pach hlôi athei pơ vang găn pơ đĭ xăh Vụ Bổn hăm hloh 4.000 ŭnh hnam, dang 18.000 ‘nu bơ ngai vă pơm kiơ̆ dôm trong jang pơ gang, tang găn jĭ tơ poh lanh lơ̆m tơ pôl. Hơ dai hăm ‘noh, Anih vei lăng kon pơ lei apŭng Krông Pach kŭm athei pơ dơh kơ jang hăm Kơ dră Anih vei lăng kon pơ lei xăh Vụ Bổn yua kơ pơm pơ hơi lơ̆m tơ drong jang tang găn jĭ.

Tơ drong tơ kêng yoch tơ̆ xăh Vụ Bổn ‘noh vă pơm hơ dăh tơ drong đei ƀôh pơm glăi “ Pơm tơ poh lanh jĭ hơ buh krê hơ mơt ăn bơ ngai” tơ chơ̆t tơ̆ hơ păng 240 Luơ̆t vei lăng pơm yoch. Jô̆ truh kơ sơ̆ ‘năr 16/8, dêh char Dak Lak đei 527 ‘nu Covid-19, lơ̆m noh đei 426 ‘nu tŏk bŏk hơ met, 2 ‘nu lôch, đei 99 ‘nu hlôi đei hơ met klăih păng brŏk đơ̆ng hnam pơ gang bơ̆ih.

Thuem: Tơ blơ̆