VOV4.Bahnar - Pơ gê ‘năr 15/4, Khŭl pơ gơ̆r jang kơ lơ anih jang găh vei rơ goh ‘lơ̆ng tơ mam sa dêh char Dak Lak pơ gơ̆r Hop akŏm tơ lĕch jang Khei bơ̆ jang yua kơ vei rơ goh ‘lơ̆ng tơ mam sa sơ năm 2021 pơ gơ̆r đơ̆ng ‘năr 15/4 truh ‘năr 15/5/2021 hăm hơ năn “ Vei rơ goh ‘lơ̆ng tơ mam sa, tang găn pơ nhŭl tơ mam sa lơ̆m tơ drong ‘nao”.

Tơ drong tơm đơ̆ng Khei bơ̆ jang ‘noh jĭ hơ tŏk loi dơ̆ng tơ drong jang tơ roi tơ băt mă ƀlep, tơ tom, tôm tơ drong, jang tơ năp găh vei rơ goh ‘lơ̆ng tơ mam sa vă hơ tŏk ‘lơ̆ng hơ năp jang đơ̆ng rim khŭl jang, rim bơ ngai, anih jang mơ dro sa lơ̆m jang kiơ̆ khôi luơ̆t găh vei rơ goh ‘lơ̆ng tơ mam sa; tŭn pran tơ drong jang dăr hơ len, dăr lăng găh vei rơ goh ‘lơ̆ng tơ mam sa tơ̆ rim anih pơm tơ lĕch, tĕch mơ dro vă tơ jur ƀiơ̆ pơ nhŭl tơ mam sa. Tơ drong tơ lĕch jang Khei bơ̆ jang yua kơ vei rơ goh ‘lơ̆ng tơ mam sa gô tơ gŭm Dak Lak hơ tŏk ‘lơ̆ng đon hlôh vao,  hơ năp jang đơ̆ng rim kơ dră, rim anih jang, khŭl jang, rim bơ ngai pơm tơ lĕch tĕch mơ dro tơ mam sa, tang găn tơ mam sa ‘mê̆ tĕch lơ̆m anih tĕch mơ dro.

Thuem: Tơ blơ̆