VOV4.Bahnar - Tơ̆ hơ năp đei ƀôh krê hơ mơt đơ̆ng jĭ tơ̆ kon tơ rong, anih vei lăng găh choh jang sa dêh char Dak Lak ‘nao tơ lĕch trong jang “Khei pơm rơ goh, pơ lôch pơ rang cham char ‘măng mă 1/2021” păng tang găn jĭ lơ̆m dêh char. Kiơ̆ kơ ‘noh đơ̆ng ‘năr 20/6/2021 truh ‘năr 20/7/2021, rim anih jang, ŭnh hnam vei rong kon tơ rong lơ̆m dêh char Dak Lak gô pơ gơ̆r pruih pơ gang pơ đĭ hơ drong, hơ nih vei rong păng tơ ring tơ jê̆ 1 giĕng 1 ‘măng. Pơm rơ goh gre, tơ mam chơ đơ̆ng rŏng rim ‘măng chơ chuĕn. Hơ pŭih rơ goh hơ nih rong chĭt kon tơ rong; pơ dŭ akŏm ĭch, râm rĕk vă soh dăh mă ƀŭ. Jô̆ truh ‘năr 17/6, Dak Lak đei 8/15 apŭng, thị xăh, pơ lei tơm đei ƀôh jĭ klak nhŭng Châu Phi, akŏp kơ sô̆ nhŭng jĭ, lôch măh soh hŭt ‘noh hloh 350 tŏ.

Thuem: Tơ blơ̆