VOV4.Bahnar - Pơ gê ‘năr 26-11, Anih vei lăng găh choh jang sa - hơ tŏk tơ iung tơ ring tơ rang dêh char Dak Lak pơ gơ̆r lêh tơ lĕch jang pơ tăm ‘long vă tơ gop vei lăng cham char bri brăh, tơ jur ƀiơ̆ tŏ ‘mi kial pơ răm, tang găn ƀơm ưh kơ ‘lơ̆ng đơ̆ng tơ plih tŏ ‘mi kial. Tơ̆ jơ pơm lêh , rim bơ ngai tang măt păng đoàn viên hơ druh tơ dăm Dak Lak hlôi pơ tăm 100 tơ nom ‘long tơ giĕr kơ jung đơ̆ng 3 met tơ̆ kơ pal tơ̆ 7 jăl trong lơ̆m pơ lei tơm Buôn Ma Thuột.

Kang ƀô̆,đoàn viên vang pơ tăm ‘long tơ̆ lêh tơ lĕch jang

‘Nâu jĭ 1 tơ drong jang tơ lĕch jang tơ drong tơ chơ̆t Hop akŏm bơ ngai tang măt Đảng bộ dêh char Dak Lak ‘măng mă XVII jăl jang 2020-2025, hăm tơ drong tơm hơ tŏk tơ drong pĕng yơ̆p bri kơ dêh char Dak Lak đei đơ̆ng 40-42%. Kiơ̆ kơ ‘noh, lơ̆m dêh char athei pơ tăm đei 10.085 hek tar bri, lơ̆m noh: Pơ tăm ‘long pơm yơ̆p ‘noh 1.000 hek tar; Pơ tăm bri tang găn, bri kơ drơ̆ng ‘noh 365 hek tar; Pơ tăm bri jang sa ‘noh 8720 hek tar.

Thuem: Tơ blơ̆