VOV4.Bahnar - Anih vei lăng găh choh jang sa păng hơ tŏk tơ iung tơ ring tơ rang dêh char Dak Lak hlôi pơ gơ̆r Hop akŏm pơ tôch sơ năm 2021, tơ lĕch jang tơ drong jang sơ năm 2022. Kiơ̆ tơ roi tơ băt tơ̆ hop akŏm, sơ năm 2021, mă đơ̆ng hơ nơ̆ng tơ ƀơ̆p lơ mơ mat tat yua đơ̆ng jĭ hơ buh COVID-19, tơ drong jĭ hơ buh lơ̆m vei rong kon tơ rong oei đei ƀôh, kơ jă, kơ sư̆k tĕch mơ dro 1,2 tơ mam choh jang sa tam mă sơ đơ̆ng, mă lei dôm tơ drong hơ găt akŏm đơ̆ng anih choh jang sa adoi iŏk đei păng yak hloh trong tơ lĕch ăn.

Lơ̆m noh, kơ jă akŏp tơ mam choh jang sa, ‘long, tơ̆r, ka hơ dang tŏk vă jê̆ 4 % pơ têng hăm sơ năm 2020; pơ tăm bri đei hloh 146% trong tơ lĕch jang, tơ drong jĭ tơ̆ ‘long pơ tăm, kon tơ rong đei vei lăng ‘lơ̆ng; kơ sô̆ xăh jang đang ‘lơ̆ng tơ ring tơ rang ‘nao ‘noh hloh 46%. Dôm jơ nei âu hlôi tơ gop gĭt kăl lơ̆m jang tŏk păng hơ tŏk tơ iung mŭk drăm - tơ pôl atŭm kơ dêh char. Kiơ̆ kơ Anih vei lăng găh choh jang sa păng hơ tŏk tơ iung tơ ring tơ rang dêh char, sơ năm 2022 Dak Lak hơ nơ̆ng hơ drin tŭn pran hơ met ming dơ̆ng tơ drong choh jang sa, tơ lĕch ăn păng jang kiơ̆ mă đei tơ drong hơ găt jang tŏk 4,56%.

Thuem: Tơ blơ̆